Aqtóbedegi talantty balalarǵa arnalǵan Jubanovtar álemi ortalyǵy 100 kúnde salyndy

AQTÓBE. QazAqparat - Kásipker Qaırat Máıtekov 100 kúnde Jubanovtar álemi ortalyǵyn saldy. Memlekettik-jekeshelik seriktestik aıasynda salynǵan ortalyqty aldaǵy ýaqytta kásipkerdiń ózi qarjylandyrady, dep habarlaıdy QazAqparat tilshisi.

Aqtóbe qalasynda Jubanovtar álemi ortalyǵy boı kóterdi. Qazirgi ýaqytta óner ordasynyń qurylys jumystary aıaqtalyp, mýzyka, sýret, bı úıirmelerine qajetti jıhazdar men quryl-jabdyqtar satyp alynyp jatyr. Aldaǵy ýaqytta bul jerde shyǵarmashylyq keshterin ótkizýge, kezdesýler uıymdastyrýǵa múmkindik bolady. Aǵaıyndy Jubanovtardyń urpaqtary mýzeıdi jabdyqtaýǵa, túrli sheberlik sabaqtaryn ótkizýge ýáde etti.

«Jubanovtar álemi ortalyǵyn ashý ıdeıasyn Aqtóbe oblysynyń ákimi Berdibek Saparbaev aıtty. Óńirdiń zııaly qaýymy basqosatyn oryn bolady. Jazýshy, sýretshi, ánshi, aqyndar osy ortalyqta basqosyp, pikir almasady. Jas talantty tanytatyn, olardyń sheberligin shyńdaıtyn biregeı orynǵa aınalmaq. Bul ortalyqqa ózimiz qarjy salyp, ári qaraı baqylaýymyzda ustaımyz. Qurylysqa 300 mıllıon teńge jumsaldy. Bar bolǵany 100 kúnde salyndy. Mundaı shyǵarmashylyq ortalyq elimizde jalǵyz. Óner adamdaryna demeýshilik jasap, qaıtarymsyz qarjy salyp, ǵımarat salǵan adam týraly áli estimedim»,- dedi Jubanovtar álemi ortalyǵynyń dırektory Laýra Amangeldıeva. Jańa ǵımarat resmı 1 jeltoqsan kúni ashylady. Munda barlyǵy 50 adam jumys isteıdi.

Kásipker Qaırat Máıtekov Aqtóbege tartý etken shyǵarmashylyq ortalyqty ári qaraı qarjylandyrady. Shyǵyny kóp, tabysy joq ortalyq úshin jylyna 15-20 mıllıon teńge salýǵa daıyn.

Máıtekovter otbasy múgedekterge, jetim balalarǵa kómektesip otyrady. Ótken jyly kópbalaly otbasyǵa baspana satyp alyp berip, ózderi bilim alǵan mektepke kúrdeli jóndeý jumystaryn júrgizdi.  

«Bizge telefon shalyp, mundaı qadamǵa nege barǵanymyzdy suraıtyndar kóp. Daǵdarys, kıim men tamaq qamy dep aıtqanymen, adam rýhanı baılyǵy týraly umytpaýy kerek. Tek tabys taýyp, baıýdyń jolyn izdeýge bolmaıdy. Tabys tapqan adam ony bólisip, jan-jaǵyna kómektesýi kerek. Óz isińniń izi qalýy kerek. Máselen, Jubanovtar otbasy. Olar bilim, mýzyka salasyna óshpes iz qaldyrdy», - dedi Laýra Amangeldıeva.

Bul ortalyqty Jubanovtar otbasynyń urpaqtary kórip, alǵysyn bildirgen. Aldaǵy ýaqytta olar tyǵyz baılanysta bolyp, Jubanovtardyń mýzeıin jabdyqtaýǵa kómektesedi.