Aqtóbedegi órt sóndirý qyzmeti dabyl júıesin tegin ornatyp jatyr

AQTÓBE. QazAqparat - Aqtóbede tótenshe jaǵdaılar qyzmeti kásipkerlerdiń qoldaýymen jeke úılerge dabyl júıesin tegin qondyryp jatyr. Órt qaýpi kúsheıgen kezde dabyl avtomatty túrde iske qosylady, dep habarlaıdy QazAqparat tilshisi.

Aqtóbe oblysy, Qobda aýdandyq tótenshe jaǵdaılar qyzmeti kásipker A.Abreshtiń qoldaýymen kópbalaly otbasy men qarııalarǵa dabyl júıesin qondyryp jatyr.

«Úıge avtonomdy órt habarlaǵyshtaryn ornatý - órttiń aldyn alý tásilderiniń biri. Eger úıde tútin bolsa, dabyl iske qosylyp, qatty dybys shyǵarady. Dabyl júıesi tegin ornatyldy. Zeınetkerler qaıyrymdylyq kómekke rızashylyqtaryn bildirdi. Al bólim qyzmetkerleri órt sóndirý «datchıkteri» týraly egjeı-tegjeıli túsindirip, olardyń áreket etý prıntsıpin jetkizdi. Órt habarlaǵyshtary tóbege nemese qabyrǵalardyń joǵarǵy bóligine bekitiledi. Dabyl júıesine elektr jelisi qajet emes. Tek jylyna bir ret qýattaǵysh batareıalardy aýystyryp, shańyn súrtken jón. Tájirıbe kórsetkendeı, kóp jaǵdaıda adamdar uıyqtap jatyp, jalyn astynda qalady. Bul dabyl uıqydaǵy adamdy oıatýǵa arnalǵan», - dep habarlady Qobda aýdandyq tótenshe jaǵdaılar bólimi.