Aqtóbedegi mektepti kórgende 1-synypqa barǵym keldi - Bojko

AQTÓBE. QazAqparat - Parlament Májilisi tóraǵasynyń orynbasary Vladımır Bojko Prezıdenttiń bes áleýmettik bastamasyn túsindirý maqsatynda Aqtóbeniń birneshe aýdandaryn aralady, dep habarlaıdy QazAqparat tilshisi.

Parlament Májilisiniń depýtattary Aqtóbege jumys saparymen keldi. Olar aýdan, aýyldy aralap, halyqqa Prezıdenttiń bes áleýmettik tapsyrmasyn túsindirdi.

«Elimizde shaǵyn nesıege bólinetin 20 mıllıard teńgeniń 14 mıllıard teńgesi aýylǵa beriledi. Shynyn aıtqanda, aýyldyń jaǵdaıy qalaǵa qaraǵanda tómen. Al Aqtóbede jaǵdaı basqasha. Gaz bar, baǵasy arzan. Men aýylǵa barǵanda jaqsy jabdyqtalǵan mektepti kórdim. Ózim 1-synypqa barǵym keldi. Yrǵyzda 600 oryndy mektep salyndy, bir jylda 14 úıdiń qurylysy aıaqtaldy. Osy qalypty saqtap, ári qaraı jumys isteý kerek. Bastysy -sheshim qabyldap, bárin sheship beretin adamdy kútip otyrýǵa bolmaıdy. Balalarǵa eńbekpen ǵana bárin jeńýge bolatynyn túsindirý mańyzdy»,- dedi Parlament Májilisi tóraǵasynyń orynbasary Vladımır Bojko.

Aqtóbe qalasyna kelgen Vladımır Bojko ótken jyly baspanasy sý astynda qalyp, jańa úı salýǵa múmkindik alǵan Qýraıly aýylynyń turǵyndarymen kezdesti. Bul aýyldan 81 adamǵa jer berilip, árqaısysyna «Qolqanat Aqtóbe» qorynan 1 mıllıon teńge berildi. Aqtóbe qalasynda aýdan kúnderi ótip, halyq asarmen qurylys júrgizdi.

«Aýyl jaqsy jerde ornalasqan, úıler ulýtastan salynǵan. Memleket sý tasqyny kezinde japa shekken adamdardy jalǵyz qaldyrmaı, kómektesedi. Aqtóbede de kásipkerler kómek kómek bergen. Al qurylys materıaldary jergilikti jerde shyǵarylady. Elimizdegi basqa óńirler áleýmettik suraqtardyń sheshimin Aqtóbeden qarap, tábirıbe jınap otyr. Mektep, balabaqsha salynyp jatyr. Sonymen qatar, Aqtóbede gaz bar, shalǵaı aýyldarǵa da jetkizilgen»,- dedi Vladımır Bojko.

Kezdesý kezinde Prezıdenttiń bes áleýmettik tapsyrmasynyń biri, bilim grantyna erekshe toqtaldy. Sebebi, elimiz úshin tehnıkalyq, aýyl sharýashylyǵy salasyna maman daıyndaý mańyzdy.

«Prezıdent qosymsha 20 myń bilim grantyn bóldi. Mektep bitirgen balalar endi tehnıkalyq, aýyl sharýashylyǵy salaǵa baǵyttaý kerek. Balalaryńyz bolsa, zańger, ekonomıst, keden qyzmetkeri men dıplomat salasyna emes, ınjenerlik, aýyl sharýashylyǵy salasyn tańdaǵany durys. Elimizde osy mamandyqtarǵa suranys joǵary, jumysy da turaqty. Jyl saıyn 18 myń stýdent zańger mamandyǵyn alyp shyqsa, olar qaıda bararyn bilmeıdi. Tehnıkalyq mamandyq el ekonomıkasyn damytýǵa qajet»,- dedi Bojko.
 

Buǵan deıin habarlaǵanymyzdaı, Vladımır Bojko Yrǵyz aýdanynda boldy.