Aqtóbedegi folklorlyq ansambl Dımash shyrqaǵan ándi ulttyq aspapta oryndady
Ǵazıza Jubanova atyndaǵy oblystyq fılarmonııanyń 75 jyldyǵyna oraı «Dostyq sazy» folklorlyq ansambli kontsert berdi. «Máńgilik eldiń murasy» kontserti kezinde Igor Krýtoıdyń «Lıýbov ýstavshıh lebedeı» áni ulttyq aspaptyń súıemeldeýimen kórermenge usynyldy.
Ansambldiń kórkemdik jetekshisi Baqytbek Zeınelovtiń jańa týyndysyna ánshi Dımash Qudaıbergen de rızashylyǵyn bildirdi.
«Ákemmen birge ósken jan dosy, 1998 jyldan beri »Dımash Álı« shyǵarmashylyq ortalyǵynyń kórkemdik jetekshisi bolyp, ata-anamnyń talaı ánderiniń jáne meniń oryndaýymdaǵy »Daıdıdaý« ánimniń aranjırovkasyn jasaǵan Baqytbek aǵa repertýarymdaǵy »Lıýbov ýstavshıh lebedeı« dep atalatyn ánimdi qazaq ulttyq aspaptaryna óńdep shyǵarǵan. Maǵan jáne ánniń avtory Igor Krýtoı aǵamyzǵa qatty unady», - dep jazdy Dımash Qudaıbergen óziniń áleýmettik paraqshasyna. Tanymal án áýeniniń óńdelýi kompozıtor Igor Krýtoıǵa da unaǵan. Ol jańa nusqanyń erekshe tartymdy ekenin jazǵan.