Aqtóbedegi «Buhara-Oral» gaz qubyrynan úshinshi jelini tartýǵa 34,5 mlrd teńge qajet

AQTÓBE. QazAqparat – Energetıka mınıstri Bolat Aqsholaqov Aqtóbe turǵyndarmen kezdesti. Júzdesýde elimizdegi, onyń ishinde óńirdegi munaı-gaz salasyn damytý jobalarymen bólisti, dep habarlaıdy QazAqparat tilshisi.

Atap óteıik, Aqtóbe oblysy munaı óndirý kólemi boıynsha elimizdegi tórtinshi óńirge jatady. Úlesi jalpy kólemniń 6%-yn alyp otyr. Qazirgi kezde óńirde 17 kompanııa qara altyn óndirýdi júzege asyrady. Munaı óndirý jáne munaı servıstik kompanııalarda barlyǵy 23 myńnan astam adam jumys isteıdi. Bul – oblystaǵy eńbekke qabiletti turǵynnyń 6%-y. Atap aıtqanda, óńirde 45 ken orny bar. Barlyǵy 48 kelisimshart jasalǵan, onyń ishinde barlaýǵa – 8, barlaý men óndirýge – 23, óndirýge – 17 kelisimshart. Óndiriletin munaı qory – shamamen 225 mln tonna, al gaz qory (erkin gaz jáne gaz búrkeýindegi gaz) – 103 mlrd tekshe metr.

Bıyl Aqtóbe jáne shekaralas Atyraý men Qyzylorda oblystarynda ornalasqan 5 jer qoınaýy boıynsha aýktsıon ótkizildi.

Mınıstr Bolat Aqsholaqovtyń aıtýynsha, AI-80, 92-93 benzınin bólshek saýdada ótkizý, sondaı-aq dızel otynyna shekti baǵalardy memlekettik retteý saqtalady.

«Gazdandyrý salasyna keler bolsaq, Aqtóbe oblysy el boıynsha aldyńǵa qatarlardyń birinde tur. Shamamen 92,7% nemese 840 myńnan astam adam tabıǵı gazǵa qol jetkizgen. Energetıka mınıstrligi gazdyń shekti kóterme saýda baǵasyn bekitedi. Degenmen, sońǵy baǵany Ulttyq ekonomıka mınıstrligi qoıady. Búgingi kúni Aqtóbe oblysynda 1 tekshe metr gaz – 11,57 teńge, al ataýly áleýmettik kómek alatyn otbasy úshin – 9,26 teńge», - dep atap ótti óz sózinde Bolat Aqsholaqov.

Bıyl energetıka mınıstrligi 18 jobany júzege asyrýǵa 6,8 mlrd teńge bóldi. Jyl qorytyndysy boıynsha 14 eldi mekendi nemese 9,6 myń adamdy gazben qamtamasyz etý josparlanǵan. Bolat Aqsholaqov gaz tasymaldaý júıesi qurylysyna qatysty jobalardy da aıtty.

Búgingi tańda Aqtóbe qalasynda 2 magıstraldyq gaz qubyry, ıaǵnı «Jańajol-Aqtóbe» jáne «Buhara-Oral» bar. Suranys artqan kezde kógildir otyndy úzdik tasymaldaý úshin «Buhara-Oral» magıstraldyq gaz qubyrynan úshinshi gaz qubyryn salý kózdeldi. Qazirgi kezde jobalyq-smetalyq qujattamasy ázirlendi. Jobanyń jalpy quny – 43,4 mlrd teńge. Oblys ákimdigi 34,5 mlrd teńge somasyna ótinim berdi. Bul bıýdjettik ótinim qaralyp, bıýdjettik zańnamaǵa sáıkes Qarjy mınıstrligine joldandy.