Aqtóbedegi áskerı qyzmetkerler «Minsiz qyzmeti úshin» medaldarymen marapattaldy

AQTÓBE. QazAqparat - Otan qorǵaýshy kúni qarsańynda № 6655 áskerı bóliminde Aqtóbe oblysynyń ákimi Berdibek Saparbaev, memlekettik mekemelerdiń basshylary, Aqtóbe áskerı garnızony, quqyq qorǵaý organdarynyń ókilderi, Uly Otan soǵysynyń jáne ІІM-niń ardagerleri, oqýshylardyń qatysýymen saltanatty shara bolyp ótti.

Jınalǵandardy merekemen quttyqtaǵan aımaq basshysy bizdiń memleket qazaqstandyq armııanyń soǵysqa qabilettiligine, Qarýly kúshterdiń materıaldyq-tehnıkalyq qamtamasyz etýdi arttyrýǵa jáne áskerı qyzmetkerlerdiń áleýmettik qamtylýyna erekshe kóńil bóletinin atap ótti.

Sharanyń barysynda Berdibek Saparbaev aımaqta ornalasqan áskerı garnızondardyń 9 áskerı qyzmetkerine «Minsiz qyzmeti úshin» medaldaryn tabystady. Birqatar sarbazdar men ofıtserler oblys ákiminiń Alǵys hattarymen marapattaldy. Bul merekelik kúni Qarýly kúshter ardagerleri de nagradalarǵa ıe boldy. Marapattaý rásiminen keıin № 6655 áskerı bólimi qyzmetkerleriniń merekelik sherýi ótti.

Sol kúni aımaq basshysy Aqtóbe garnızonynyń jabdyqtaǵan arnaıy tehnıkamen tanysyp ótti. Berdibek Saparbaev joryq as úıinen sarbazdar botqasynan da dám tatty, dep habarlaıdy «Aqtóbe aqparat» portalynan.