Aqtóbedegi 5 sot ǵımaratyna «mına qoıyldy»

AQTÓBE. QazAqparat – Aqtóbede bir sátte birneshe sottyń elektrondy poshtasyna jarylǵysh zattyń qoıylǵany týraly aqparat tústi. Polıtsııa tekserýden soń bomba tabylmaǵanyn málimdedi, dep habarlaıdy QazAqparat tilshisi.

Aqtóbe oblystyq qylmystyq ister jónindegi mamandandyrylǵan aýdanaralyq soty, Aqtóbe qalalyq qylmystyq ister jónindegi mamandandyrylǵan aýdanaralyq soty, Aqtóbe qalalyq soty, Aqtóbe mamandandyrylǵan ákimshilik soty men Qarǵaly aýdandyq sotynyń elektrondy poshtasyna bomba týraly aqparat tústi. Aqparatty polıtsııa arnaıy tekserdi.

«Oqıǵa ornynda saperler jumys istep, ǵımaratqa tekserý júrgizildi. Barlyq qajetti is-sharalar ótkizildi. Jarylǵysh zat tabylǵan joq», - dep habarlady oblystyq PD baspasóz qyzmeti.

Eske salsaq, byltyr qyrkúıek aıynda bir sátte birneshe mektepke jarylǵysh zat qoıylǵany týraly aqparat tústi.

Ol kezde barlyq mektep oqýshysy men muǵalim qaýipsiz jerge shyǵarylyp, polıtsııa jumys istedi. Bilim ordalarynan eshqandaı bomba tabylmady. Arada bir jyl ótse de jalǵan aqparatty kimniń jibergeni anyqtalǵan joq.

Osy derek boıynsha QR QK 273-baby boıynsha sotqa deıingi tergeý júrgizilip jatyr. Aqtóbe oblysynyń Polıtsııa departamenti terrorızm aktisi týraly kórineý jalǵan habarlaý qylmystyq quqyqbuzýshylyq bolyp tabylatynyn jáne QR QK 273-babynda kózdelgen qylmystyq jaýaptqa tartylatynyn eske salady.

Foto: t.me/POLICE_of_KZ