Aqtóbedegi jol apaty: úsh balasy men kúıeýinen aırylǵan áıel zańsyz tergelgen

<p>AQTÓBE. KAZINFORM - Jol-kólik apaty kezinde úsh balasy men kúıeýinen aıyrylǵan S.Jaqsylyqova jazyqsyz jaýapqa tartylǵany úshin moraldyq jáne materıaldyq shyǵyndy óndirýdi talap etti. Sot sheshimimen oǵan 3,3 mln teńge óndirildi.</p>

Aqtóbe qalasy №3 sotynyń baspasóz qyzmetiniń habarlaýynsha, S.Jaqsylyqova moraldyq zııan men advokat eńbegin tóleýge jumsalǵan shyǵyndardy óndirý týraly talap-aryz túsirdi.

- Áıteke bı aýdandyq soty aıyptalýshyny aqtady. Sol kezde talap qoıýshyǵa qylmystyq jaýapkershilikke zańsyz tartylǵany úshin keltirilgen zııandy óteý quqyǵy túsindirildi. Sot talap qoıýshynyń qozǵalys erkindigi shekteýli bolǵanyn, bolǵan oqıǵada otbasynan, onyń ishinde úsh kámeletke tolmaǵan balasynan aıyrylǵanyn, basynan ótken moraldyq azaptaryn eskere otyryp, onyń paıdasyna 2 000 000 teńge moraldyq zııan jáne qylmystyq is júrgizý kezinde advokattyń eńbegin óteýge ketken 1 300 000 teńge shyǵynyn óndirdi. Sottyń sheshimi zańdy kúshine engen joq, - dep habarlady Aqtóbe qalasy №3 sotynyń baspasóz qyzmeti. 

Eske salsaq, Áıteke bı aýdandyq sotynda Qylmystyq kodekstiń «Abaısyzda eki nemese odan da kóp adamnyń ólimine ákep soqqan jol qozǵalysy qaǵıdalaryn buzý» baby boıynsha is qaraldy.

Іs materıalyna súıensek, 2023 jyldyń 21 aqpan kúni saǵat shamamen 14:00-de sottalýshy áıel joldasy jáne 3 balasymen Aqtóbe qalasynan T.Jýrgenov aýylyna baǵyt alǵan. Tergeýshiler «Mitsubishi Montero Sport» markaly avtokóligin aıdaǵan áıel «Samara-Shymkent» tas jolynyń 921 shaqyrymynda joldyń qarsy baǵytyna shyǵyp, tirkemesi bar «VOLVO» markaly júk kóligimen soqtyǵysqanyn tirkedi.

Oqıǵa saldarynan barlyq jolaýshy, ıaǵnı, úsh bala men kúıeýi kóz jumdy.