Aqtóbedegi jol apaty: Kólik ishinde taǵy eki balanyń mert bolǵany anyqtaldy

<p>AQTÓBE. KAZINFORM &ndash; Samara-Shymkent tasjolyndaǵy jol-kólik apaty týraly tyń aqparat shyqty. Kólikte taǵy eki balanyń bolǵany anyqtaldy.</p>

Aqtóbedegi jol apaty kezinde qaza tapqan oqýshy sany 5-ke jetti.

- Búgin tańerteń Samara-Shymkent avtojolynda júk kóligimen Toyota-Ipsum avtokóligi soqtyǵysyp, 6 adamnyń qaza bolǵany týraly habarlandy. Qazirgi kezde kólik salonynan taǵy eki balanyń denesi shyǵaryldy. Nátıjesinde apat saldarynan mınıven júrgizýshisi men jeti jolaýshy, onyń ishinde bes bala qaza tapty. Jol apaty bolǵan jerde tergeý is-sharalary júrgizilip jatyr jatyr,- dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.

Aıta keteıik, oqıǵa ornyna búgin ǵana taǵaıyndalǵan Aqtóbe oblysy ákiminiń orynbasary Joldas Batyrhan men oblystyq bilim basqarmasynyń mamandary da ketti.

«Samara-Shymkent tasjolynda jantúrshigerlik jol apaty boldy. Saldarynan birneshe jerlesimiz marqum boldy. Arasynda jas jetkinshekter, kámeletke tolmaǵan balalar da bar. Aldyn ala málimetterge qaraǵanda balalar jeke uıymnyń shaqyrtýymen ata-analarymen birge kórshi oblysta uıymdastyrylǵan jarysqa shyqqan. Jarys oblystyq bilim basqarmasynyń, oblystyq dene shynyqtyrý jáne sport basqarmasynyń kestesinde joq. Qazirgi tańda qylmystyq is qozǵaldy. Tergeý júrip jatyr. Barsha marqumdardyń otbasyna, ata-analaryna kóńil aıtamyz,- dedi Aqtóbe oblysy ákiminiń orynbasary Joldas Batyrhan.

Eske salsaq, «Samara-Shymkent» halyqaralyq mańyzy bar tas jolynda Hromtaý aýdanynyń aýmaǵynda Toyota Ipsum mınıveni jáne MAN markaly júk kóligi soqtyǵysty. Oqıǵa saǵat 10:00 shamasynda bolyp, barlyǵy 8 adam qaza tapty.