Aqtóbedegi Prezıdent rezıdentsııasynyń bir bóligi ǵana balalarǵa beriledi

<p>Aqtóbedegi Prezıdent rezıdentsııasyn balalar qajetine jaratý týraly tapsyrma áli oryndalmaı tur. Jergilikti ákimdik tek tórtten bir bóligin, bir ǵana qonaqúıdi alýǵa kelisim jasap jatyr, dep habarlaıdy QazAqparat tilshisi.</p>

Bıyl aqpan aıynda Prezıdent birneshe aımaqtaǵy rezıdentsııany balalarǵa berý kerek dep aıtqanymen, bul tapsyrma Aqtóbe oblysynda áli naqty sheshimin tapqan joq. Qazirgi kezde jergilikti ákimdik shamamen 1 gektardan asatyn aýmaqtyń tórtten bir bóligin ǵana alýǵa kelisim jasap otyr. Onda da 500 sharshy metr bolatyn qonaqúıdiń tek 40% ǵana turýǵa jaramdy. Qalǵan bóligi qyzmettik bólmeler.

"Meniń aqparatym boıynsha úı 2008 jyly salynǵan. Onda kim turǵanyn men aıta almaımyn. Qonaqúıde qazir eshkim turmaıdy. Búgingi tańda rezıdentsııada ornalasqan qonaqúı memlekettik mekeme balansynda. Jeri – «Qazhrom» TUK» AQ-yna tıesili. Qazir jerdi bólý jumysy júrip jatyr. Jalpy, úıdiń aýdany – 500 sharshy metr. Eger balalarǵa berilse, 500 sharshy metrdiń 40 paıyzy turýǵa arnalady. Ózgesi ashana, jýynatyn bólme, kir jýý orny. Ár balaǵa 6 sharshy metrden tıesili desek, jalpy 25 bala ǵana tárbıelenedi. Jerdi bólse, sol úıge arnaıy bólek kirip-shyǵý joly qarastyrylady. «Qazhrom» TUK» AQ-nyń balalarǵa arnalǵan oıyn alyńyn salyp bergenin qalaımyz. Qazir kelissóz júrip jatyr", - dedi Aqtóbe oblysy ákiminiń is basqarmasy basshysynyń orynbasary Tımýr Ryskeldın.

Munda jer bólý jumystary sheshilgen soń balalarǵa yńǵaılap jóndeý júrgizilýi múmkin.

"Jerge qatysty suraqqa naqty jaýap bere almaımyz. Tek bári zańdy túrde júrgiziletinin aıtqym keledi. Memlekettik mekemege tıesili kottedjdiń aýmaǵy ǵana ákimdikke beriledi. Qazir ol jerge kire almaımyz. Kompanııaǵa tıesili», - dedi Tımýr Ryskeldın.

Eske salsaq, bıyl qysta Aqtóbe oblysy ákimdigi rezıdentsııa aýmaǵy, ondaǵy ǵımarattar týraly aqparat taratpady. Tek balalarǵa arnalǵan nysanǵa aınalatynyn habarlady.