Aqtóbedegi gaz zaýytyndaǵy órtke jumys berýshiler kináli dep tanyldy

<p>AQTÓBE. KAZINFORM &ndash; Aqtóbe oblystyq mamandandyrylǵan ákimshilik sotynda munaı kompanııasynyń shaǵymy negizinde apellıatsııalyq is qaraldy. Onda zaýytta bolǵan jazataıym oqıǵaǵa jumys berýshi kináli degen sheshim ózgerissiz qaldy.</p>

Aqtóbeniń Jańajol ken ornynda byltyr órt bolyp, tórt jumysshy zardap shekti. Aýrýhanaǵa túsken 2 adam kóp uzamaı kúıikten kóz jumdy.

Osydan soń Aqtóbe oblystyq eńbek ınspetsııasy basqarmasy tekserý jumystaryn júrgizip, jazataıym oqıǵaǵa jumys berýshi kináli dep tanyldy. Al «SNPS-Aqtóbemunaıgaz» AQ-na tıesili Jańajol gaz óńdeý zaýytynyń basshylyǵy bolsa, eńbek ınspektsııasy jasaǵan aktiniń qorytyndysymen kelispedi.

- Byltyr Aqtóbe oblystyq eńbek ınspektsııasy basqarmasy basshysynyń buıryǵymen arnaıy tergeý jónindegi komıssııa quryldy. Tergeýden soń akt toltyryldy. Úsh jumysshynyń jaraqat alǵanyna 100%, al tórtinshisine 80% jumys berýshi kináli dep tanyldy. Kompanııa akt qorytyndysyna kelispeı, sotqa shaǵym túsirdi. Komıssııa quramyna kúmánmen qarap, órttiń naqty sebebi anyqtalmaǵany, arnaıy tergeý júrgizý tártibiniń buzǵylǵany týraly aıtty ári aktini zańsyz dep tanýdy surady. Sot «SNPS-Aqtóbemunaıgaz» AQ-y usynǵan dáleldemelerdi negizsiz dep tanyp, tergeý kezinde óreskel buzýshylyqtar bolmady degen qorytyndyǵa keldi. Sheshim zańdy kúshine engen joq,- dep habarlady Aqtóbe oblystyq mamandandyrylǵan ákimshilik sotynyń baspasóz qyzmeti.