Aqtóbedegi boran: Tótenshe jaǵdaı jarııalanǵan bir aýdannyń shyǵyny esepteldi

<p>AQTÓBE. KAZINFORM - Boran kezinde Áıteke bı aýdanynda mekteptiń shatyry, qasbeti ushyp, órt sóndirý bólimi ǵımaraty zaqymdandy. Qazirgi kezde shyǵyn kólemi eseptildi.</p>

Aqtóbe oblysy Áıteke bı jáne Hromtaý aýdandarynda úı, mektep shatyry ushyp, áleýmettik nysannyń qasbeti zaqymdandy. Qazirgi kezde Áıteke bı aýdanyndaǵy shyǵyn esepteldi.

- Qarabutaq aýyly Shevchenko atyndaǵy mekteptiń shatyryn kúrdeli jóndeýden ótkizý úshin jobalyq-smetalyq qujattama jasaý qajet. Qazir merdiger mekeme jobany daıyndap jatyr. Qalpyna keltirý quny shamamen 55-60 mln teńge bolady. Oblystyq bilim basqarmasy arqyly oblystyq rezervten qarjylandyrylady. Úshqatty aýylyndaǵy mekteptiń bir jaq qasbetin jóndeý shyǵyny 1,5 mln teńgege shyǵyp tur. Ony 2021 jyly kúrdeli jóndeý jumystaryn júrgizgen merdiger mekeme kelisimshart kepildemesi aıasynda jasaıdy. Al Áıke aýylyndaǵy Órt sóndirý beketiniń shatyryn qalpyna keltirýge 800 myń teńge qajet. Ol aýdandyq rezerv qarajytymen jóndeledi, - dep habarlady Áıteke bı aýdanynyń ákimi Dáýletııar Toǵyzbaev.

Aqtóbe oblysy ákiminiń baspasóz qyzmetiniń habarlaýynsha, Hromtaý aýdanynda ázirge shyǵyn eseptelip jatyr. Mundaǵy bes qabatty úıdiń shatyrynan ózge ǵımaratqa qandaı zaqym kelgeni belgisiz.

Al Aqtóbe qalasynda kópqabatty bes úıdiń shatyry búlindi.