Aqtóbedegi bóbekjaı-baqshada balalardyń tańǵy asynan qońyz shyqty
Áleýmettik jelige jarııalanǵan vıdeodan balalardyń tańǵy asyna botqa daıyndalǵany, al onyń ishinde qońyzdardyń júrgenin kórýge bolady.
Aqtóbe oblystyq bilim basqarmasy baspasóz qyzmetiniń habarlaýynsha, qazir tekserý júrip jatyr.
- Ata-analardan aryz-shaǵym túspedi. Qazirgi kezde áleýmettik jelidegi vıdeo men foto materıaldy negizge alyp, qyzmettik tekserý júrgizilip jatyr. Qorytyndysy boıynsha qosymsha habarlaımyz, - dedi Aqtóbe oblystyq bilim basqarmasy baspasóz qyzmeti.
Al Muǵaljar aýdandyq bilim bólimi qorytyndy shyqqan soń laýazymdy tulǵalar men qyzmetkerler jaýapqa tartylatynyn habarlady.
- Búgin saǵat 9:00-degi tańǵy as kezinde suly botqasy (kasha) taratylǵan. Al oǵan deıin tamaq pisirý kezinde bóbekjaı-baqsha meıirbekesi Kamshat Sársenova astan synama alǵan. Ol kezde turt, taǵy sol sııaqty jándikter bolmaǵanyn aıtyp otyr. Alǵashqy 2 topqa taratqan kezde qurttardy kórip, sol jerde tańǵy as berýdi toqtatqan. Suly jarmasy bóbekjaı-baqshaǵa qarasha aıynda ákelingen. Jaramdylyq merzimi - 18 aı. Qazirgi ýaqytta Muǵaljar aýdandyq bilim bóliminiń tarapynan qyzmettik tekserý jumystary júrgizilýde. Qortyndysy boıynsha jaýapty tulǵalar men qyzmetkerler tıisti jaýapkershilikke tartylady. Sonymen qatar atalǵan másele boıynsha Muǵaljar aýdandyq sanıtarııalyq - epıdemıologııalyq baqylaý basqarmasy tarapynan da tekserý jumystary bastaldy, - dedi Muǵaljar aýdandyq bilim bóliminiń basshysy Bahraman Amanjol.
Eske salsaq, byltyr Aqtóbe qalasynda bıylǵy oqý jylynda bastaýysh synyptyń 6 oqýshysy astan ýlandy. Epıdemıologtar isti polıtsııaǵa tapsyrdy.