Aqtóbedegi aýrýhanada medıtsına qyzmetkerinen týberkýlez anyqtaldy
Qazir onymen baılanysta bolǵan áriptesteri men balalar tekserilip jatyr.
2024 jyldyń qańtar-aqpan aılarynda balalar aýrýhanasyna jatyp, em qabyldaǵan aqtóbelik áleýmettik jeli arqyly óz renishin bildirdi. Oǵan emhanadan habarlasyp, analız tapsyrýyn suraǵan. Sebebin dárigerden týberkýlez anyqtaldy dep túsindirgen.
Aqtóbe oblystyq balalar aýrýhanasynyń habarlaýynsha, rasymen de bir qyzmetkerden qurt aýrýy anyqtaldy.
— Kópsalaly balalar aýrýhanasynyń ákimshiligi statsıonar qyzmetkerinen týberkýlez anyqtalǵanyn rastady. 2023 jyldyń jeltoqsan aıynda jumysqa qabyldanǵan qyzmetker medıtsınalyq tekserýden ótken. Jumys isteýge ruqsat beretin medıtsınalyq kitapshasy bar. Al 2024 jyldyń qarasha aıynda týberkýlezge shaldyqqany rastaldy. Sondyqtan onymen baılanysta bolǵan adamdar men medıtsına qyzmetkerleri tekserýden ótip jatyr, — dep habarlady Aqtóbe oblystyq kópsalaly balalar aýrýhanasynyń ákimshiligi.
Aqtóbe oblystyq densaýlyq saqtaý basqarmasynyń málim etkendeı, 55 medıtsına qyzmetkeri 700-den astam bala tekserýden ótýi tıis. Qazirgi kezde barlyq qyzmetker tekserildi. Al balalardy tekserý sharasy áli jalǵasyp jatyr.
— Mamyr aıynan bastap densaýlyǵyna baılanysty demalys alǵan. Aldymen JRVI, keıin pnevmonııadan em qabyldaǵan. Medıtsına qyzmetkeri jansaqtaý bóliminde medbıke bolyp jumys istegen, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Eske salsaq, Aqtóbede pırotehnıkany durys paıdalanbaǵan eki adamdy jeńil kúıik shaldy.