Aqtóbedegi 250-den astam aıaldamada áli kúnge deıin pavılon joq
Bıyl 56 aıaldama pavılony salynýy tıis
Aqtóbe qalasyndaǵy jańa turǵyn úı alaptarynda jáne shahardyń eski bóliginde jańbyr men qar jaýǵanda qorǵanatyn, jel kúni yqtaıtyn 56 jańa pavılon salynýy tıis.
Qala ákimi baspasóz qyzmetiniń jetekshisi Aıgúl Baımenovanyń aıtýynsha, merdiger mekeme – «REGION-04 Service» JShS-i. Seriktestik Eset batyr, Jibek joly turǵyn alaptary men Malyshka aýdanynda jańa pavılon salý, toǵyzy jetkenin aýystyrý mindetin moınyna alǵan.
Kazinform Memlekettik satý saıty arqyly Aqtóbe qalasy turǵyn úı-kommýnaldyq sharýashylyǵy, jolaýshylar kóligi jánek avtomobıl joldary bóliminiń basshysy Bolat Serikov pen «REGION-04 Service» JShS-i basshysy arasynda 49 mln teńgege kelisimshart jasalǵanyn anyqtady. Konkýrs bıyl maýsym aıynda jarııalanǵanymen, jeńimpaz qyrkúıek aıynyń sońynda ǵana belgili boldy. Talap boıynsha merdiger jyl sońyna deıin 56 pavılondy ornatýǵa mindetti. Sonymen birge bir jyldyq kepildigi bar. Orta eseppen ár aıaldama pavılonynyń quny 800 myń teńgeden asady.
Aıaldama pavılondaryn jóndeýge 16 mıllıon teńge bólindi
Aqtóbe qalasy boıynsha barlyǵy 757 aıaldama bar. Onyń 506-ynda pavılon ornatylǵan. Demek 250-den astamynda áli kúnge deıin turǵyndarǵa esh jaǵdaı jasalmaǵan.
Qala ákimi baspasóz qyzmetiniń jetekshisi Aıgúl Baımenovanyń aıtýynsha, jańasyn salýmen qatar jóndeý jumystary da júrgizilýi tıis. Bıyl bul jumysty «Baıuly NS» JShS-i óz mindetine alǵan. Memlekettik tapsyrys aıasynda kem-ketigi bar aıaldama pavılondaryndaǵy oryndyqtardy jóndeý, boıaý, dánekerleýge 16,8 mln teńge bólindi.
Memlekettik satyp alý saıtyndaǵy aqparatqa súıensek, jumys bıyl jyl sońyna deıin júrgiziledi.
Temir, áınek pavılondar men ashyq aspan astyndaǵy kútý alańy
Aqtóbe qalasynda áınekten jasalǵan aıaldama ornatý jumysy 2017 jyldan bastaldy. Ol kezde ortalyq kóshelerge basymdyq berildi. Sonymen birge qazirgi kezde 16 jyly aıaldama jumys istep tur. Bul aıaldama pavılondary qalanyń ortalyq bóliginde ornalasqan.
- Barlyq jyly aıaldamalar retke keltirilip, qys mezgiline daıyndalyp jatyr. Ázirge 16 jyly aıaldama bar. Kelesi jyly da jyly aıaldamalar salý úshin qalalyq sáýlet jáne qala qurylysy bólimi ınvestorlarmen sóılesip jatyr,- dedi Aqtóbe qalasy ákiminiń baspasóz hatshysy Aıgúl Baımenova.
Kazinform tilshisi qalanyń birneshe bóligin aralap, aıaldamalardyń kúıin kórip shyqty. Máselen halyq kóp shoǵyrlanatyn Ortalyq bazardaǵy aıaldama pavılony jaz aıynda súrilip, jańasy salynýy tıis edi. Biraq aıaldamadaǵy oryndy jalǵa alǵan kásipker qurylysty aıaqtaýǵa asyǵar emes. Qazir temir qańqasy bar, al adamdar saýda ornyn jańalap, aǵashtardy panalap tur.
Sondaı-aq qaladaǵy áınekten jasalǵan aıaldamalarǵa jarnama ilý toqtamaı tur. Ony jýyp, retke keltirý jumysyn Aqtóbe qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine baqylaýy tıis bolsa da qazirgi kezde adam shoshyrlyq keıipke engen.
Aqtóbe oblystyq PD baspasóz qyzmetiniń jetekshisi Erbolat Sarqulovtyń aıtýynsha, bıyl 7 myńǵa jýyq usaq buzaqylyq tirkeldi. Onyń ishinde aıaldamalardy búldirgen, syndyrǵandar da bar.