Aqtóbede jyl saıyn mıllıon sharshy metrden astam turǵyn úı paıdalanýǵa beriledi
Aqtóbede Qurylysshylar kúnine arnalǵan merekelik jıyn ótti. Oblys ákimi Ońdasyn Orazalın qurylysshylardy kásibı merekemen quttyqtap, jumysta joǵary nátıjege qol jetkizgenderin «Qurmetti qurylysshy» jáne «Oblysqa sińirgen eńbegi úshin» tósbelgisimen, Indýstrııa jáne ınfraqurylymdyq damý mınıstri Q.Óskenbaevtyń alǵys hattarymen marapattady.
Elimiz táýelsizdik alǵaly beri Aqtóbe oblysynda turǵyn úı qurylysy jandandy. 2013 jyly qazirgi Eset batyr turǵyn úı alabynyń qurylysy bastalsa, qazir munda 11 myńǵa jýyq otbasy turady. Qazirgi tańda Batys-2 jáne Batys-3 shaǵyn aýdandarynyń qurylysy qarqyndy júrip jatyr. Qala aýmaǵynda Baýyrlastar, Raýan, Aqjar, Aqshat, Jańaqonys jáne basqa da turǵyn úı alaptary salynyp jatyr.
«Sońǵy úsh jylda oblys boıynsha 3,2 mln sh.m. turǵyn úı nemese 22,1 myń páter paıdalanýǵa berildi. Turǵyndar úshin jańa mektepter, aýrýhanalar, sporttyq jáne mádenı nysandar salyndy. Búgin biz barsha qurylysshylarǵa el men qoǵam ıgiligi jolyndaǵy qajyrly eńbekteri úshin alǵysymyzdy bildiremiz», - dedi oblys ákimi Ońdasyn Orazalın.
Sonymen qatar shara barysynda oblys ákimi «Nektar» ÓK basshysy Shamıl Kaspranovty 75 jasymen quttyqtap, alǵys hat tabystady.
2022 jyldyń jeti aı qorytyndysyna sáıkes barlyq qarjylandyrý esebi oblys boıynsha 426 myń sh.m. turǵyn úı paıdalanýǵa tapsyryldy. Bul 2021 jyldyń tıisti kezeńimen salystyrǵanda 102,7% quraıdy. Jyldyń sońyna deıin atalǵan kórsetkishti 1,2 mln sh.m. deıin jetkizý josparlanǵan.