Aqtóbede jyl saıyn 1 myń kópbalaly otbasyǵa páter berilmek
Turǵyn úı qurylys jınaq bankiniń Aqtóbe oblystyq fılıalynda 93 myńnan astam salymshy bar. Qazirgi kezde depozıt qory 45,6 mıllıard teńgege jetken. Bank 2018 jyly «Nurly jer» baǵdarlamasy aıasynda 1717 páter berdi. Bıyl da jergilikti atqarýshy organmen qatar jetim balalardy, jastardy, kópbalaly jáne tolyq emes otbasy sanatyndaǵy adamdardy baspanamen qamtamasyz etý jumysy júredi. Sonymen qatar, QR Prezıdenti Nursultan Nazarbaevtyń tapsyrmasymen «Baqytty otbasy» baǵdarlamasy da iske asyrylady.
«Elbasy tapsyrmasymen Turǵyn úı qurylys jınaq bankine 150 mıllıard teńge bólinip, kópbalaly analardy baspanamen qamtý qolǵa alyndy. Bul baǵdarlamamen 4 jáne odan da kóp balasy bar otbasy, múgedek balasy bar adamdar men tolyq emes otbasy páter ala alady. Máselen, baspana quny 10 mıllıon teńge bolsa, Aqtóbe qalasynan 3 bólmeli páter alýǵa bolady. 8 jyl boıy aı saıyn 52,3 myń teńge, qalǵan 11 jylda 36 myń teńge tóleıdi. Osy jolmen jyl saıyn 1 myń otbasyǵa páter berý josparlanyp otyr», - dedi «Turǵyn úı qurylys jınaq banki» Aqtóbe oblystyq fılıalynyń dırektory Jedelbek Myrzaǵaleev.