Aqtóbede jyl basynan beri 18 myńnan astam adam jumyspen qamtyldy
Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasy óńirlik kommýnıkatsııalar qyzmetinde 7 aıdyń qorytyndysyn jasady. Basqarma basshysy Aslanbek Shúıinshalıevtiń aıtýynsha, osy ýaqyt aralyǵynda 18 myńnan astam jumys orny quryldy. Onyń 7 myńnan astamy turaqty.
«Qysqa merzimdi kásiptik oqytýǵa 728 adam jiberilip, oqýdy aıaqtaǵan 117 adam jumysqa ornalasty. «Bastaý Bıznes» jobasy arqyly myńǵa jýyq adam kásipkerlik negizderin meńgerdi. Qazirgi kezde bıznes ıdeıalardy iske asyrý úshin 15 adam 18 mln teńgeden astam qarjy aldy. Jyl sońyna deıin taǵy 400 adam qaıtarymsyz grant ıelenedi», - dedi Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Aslanbek Shúıinshalıev.
Aqtóbe oblystyq statıstıka departamentiniń málimeti boıynsha, jyldyń ekinshi toqsanynda jumyssyzdyq deńgeıi 4,8% qurady. Qazirgi kezde jumyssyzdar sany 21,2 myń adamdy qurap otyr. Onyń 7 myńnan astamy aýylda turady.
«Qazirgi ýaqytta www.enbek.kz respýblıkalyq saıtynyń «Jumys» portalynda 6 myńnan astam bos jumys orny jarııalandy. Sonymen birge óńirde júıeli túrde bos jumys oryndary jármeńkeleri ótkiziledi. Bıyl jármeńkege 1302 adam qatysyp, 839 adam jumysqa ornalastyryldy. Memleket basshysynyń tapsyrmasyna oraı Óńirlik jumyspen qamtý kartasy jasaldy. Osy karta aıasynda bıyl 9 myńnan astam jumys ornyn qurý josparlandy. Qazirgi ýaqytta joba sheńberinde 2 047 jumyssyz azamat eńbekke aralasty», - dedi Aslanbek Shúıinshalıev.