Aqtóbede júrgizýshi kýáligin zańsyz berýmen aınalysqandar HQKO qyzmetkerleri emes – Azamattarǵa arnalǵan úkimet

NUR-SULTAN. QazAqparat – «Azamattarǵa arnalǵan úkimet» memlekettik korporatsııasy Aqtóbede ustalǵan uıymdasqan qylmystyq top músheleriniń áreketine qatysty resmı málimdeme jasady, dep habarlaıdy QazAqparat tilshisi.

19 tamyzda Aqtóbe oblysy boıynsha polıtsııa departamentiniń jeke qaýipsizdik basqarmasy qyzmetkerleri qalalyq mamandandyrylǵan halyqqa qyzmet kórsetý ortalyǵynda (HQKO) azamattarǵa júrgizýshi kýáligin zańsyz bergeni úshin kúdiktilerdi ustady.

QR Іshki ister mınıstrliginiń BAQ-qa taratqan aqparatyna sáıkes, uıymdasqan qylmystyq top qatysýshylary ıaǵnı mamandandyrylǵan HQKO-nyń qyzmetkerleri keıbir klıentterdiń emtıhanǵa kedergisiz kirýine kómektesken.

«Teorııalyq emtıhan tapsyrý kezinde paıdalanylatyn bıometrııalyq júıege qyzmetimen «U-Study» JShS aınalysady. Sondaı-aq, emtıhan tapsyrýǵa kelgen kandıdattardy tekserý jáne olardy synaq ótetin kabınetke kirgizýmen de «U-Study» JShS qyzmetkerleri aınalysady», – dedi «Azamattarǵa arnalǵan úkimet» memlekettik korporatsııasynyń basqarýshy dırektory Narıman Dúısekeev.

Onyń aıtýynsha, Aqtóbe oblysy boıynsha polıtsııa departamentiniń jeke qaýipsizdik basqarmasy ókilderi mamandandyrylǵan HQKO-nyń qyzmetkerlerin emes, «U-Study» JShS-niń qyzmetkerlerin ustaǵan.

Aıta ketsek, buǵan deıin QR Іster mınıstrligi Aqtóbede uıymdasqan qylmystyq top azamattarǵa júrgizýshi kýáligin zańsyz berýmen aınalysqany týraly habarlaǵan edi.

Atalǵan vedomstvonyń málimetine sáıkes uıymdasqan qylmystyq top músheleri mamandandyrylǵan halyqqa qyzmet kórsetý ortalyqtarynyń (HQKO) qyzmetkerleri.