Aqtóbede jumys ornynda sirińke tutatqan káriz stansasy operatorynyń denesin túgel kúıik shaldy

AQTÓBE. QazAqparat – Aqtóbe oblysy Temir aýdany Keńqııaq aýylyndaǵy káriz-sorǵy stansasynda gaz-aýa qosyndysy jarylyp, operatordyń denesin túgel kúıik shaldy. Aldyn ala boljam boıynsha, ol oqıǵa ornynda sirińke tutatqan, dep habarlaıdy QazAqparat tilshisi.

Aqtóbe oblysy ákiminiń baspasóz qyzmetiniń habarlaýynsha, oqıǵa keshe saǵat 22:55-te tirkeldi. Keńqııaq aýyldyq aýrýhanasyna «Keńqııaq-SK» KMK káriz-sorǵy stansasynda jumys isteıtin operatordyń kúıik shalyp túskeni belgili boldy.

«Aldyn ala boljam boıynsha, operator káriz jınaý beketiniń esigin ashyp, shyrpy tutatqan. Kúıik shalǵan kezde birden kúıeýine habarlasyp, ol aýrýhanaǵa jetkizgen. Qazirgi kezde káriz stansasy shtattyq rejımde jumys istep tur. Tergeý jumystary júrip jatyr. Alǵashqy anyqtalǵan sebebi – órt qaýipsizdigi erejesiniń saqtalmaýy. Naýqastyń denesiniń 90-95%-yn kúıik shaldy. Keńqııaq aýyldyq aýrýhanasy alǵashqy kómek kórsetti. Al túnde áıel sanavıatsııamen oblys ortalyǵyna jetkizildi», - dep aqparat taratty oblys ákiminiń baspasóz qyzmeti.

Eske salsaq, Aqtóbeniń Keńqııaq aýylynda buǵan deıin munaı-gaz kesheni órtenip, tórt jumysshyny kúıik shaldy. Olar oblys ortalyǵy men Astana qalasyndaǵy aýrýhanaǵa jetkizildi. Eki jumysshy aýrýhanada kóz jumdy.