Aqtóbede júk kóligi men jeńil kólik soqtyǵysyp, eki adam kóz jumdy

<p>AQTÓBE. KAZINFORM &ndash; Aqtóbe oblysy Muǵaljar aýdany aýmaǵynda jeńil jáne júk kóligi soqtyǵysyp, eki adam qaza tapty. Bir adam sanavıatsııa tikushaǵymen oblys ortalyǵyna jetkizildi.&nbsp;</p>

Aqtóbe oblysy Muǵaljar aýdanyndaǵy jol apaty kezinde dárigerler barlyǵy 6 adamdy qarap shyqty. Jeńil kólik ishinde bolǵan 67 jastaǵy áıel oqıǵa ornynda kóz jumdy. 

5 adam Embi aýdandyq aýrýhanasyna jetkizildi. Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, jeńil kóliktiń 32 jastaǵy júrgizýshisiniń basy jarylyp, ishki aǵzalaryna zaqym kelgen. Búgin saǵat 14:00 shamasynda júregi toqtap qaldy. 

– Kólik ishinde bolǵan 55 jastaǵy áıel de bas-mı jaraqatyn aldy. Qazirgi kezde jaǵdaıy turaqty aýyr. Al, 60 jastaǵy áıeldiń ish qurylysy zaqymdanǵan. Embi qalasyna sanavıatsııa jiberilip, naýqas oblys ortalyǵyna jetkizildi. Sonymen birge 25 jastaǵy jigittiń mıy shaıqalyp, hırýrgııa bólimine jatqyzyldy. Júk kóligi júrgizýshisiniń jaǵdaıy qalypty. Aýrýhanadan shyǵarýǵa daıyndalyp jatyr, - dedi Aqtóbe oblystyq densaýlyq saqtaý basqarmasy baspasóz qyzmeti. 

Aqtóbe oblystyq PD baspasóz qyzmeti bul oqıǵa týraly qandaı da bir aqparat taratpady.

Aıta keteıik, ótken aptada Aqtóbede eki jol apaty boldy. Onda da júk jáne jeńil kólik soqtyǵysyp, birinshisinde 8 adam qaza tapty. Kólik ishinde 5 bala boldy. 

Ekinshi oqıǵa kezinde jeńil kólik ishinde bolǵan eki adam kóz jumdy.