Aqtóbede jol jóndeý jumystary qarqyndy júrip jatyr
Baýyrlastar-3 turǵyn alabynda «Jaıly mektepke» kireberis jol salynýda. Eldimeken damyp keledi, qolaıly ómir súrý úshin barlyq kommýnıkatsııa úılerge tartylǵan. Endi qalyp turǵany — joldardy retke keltirý jáne halyqqa yńǵaıly qoǵamdyq kólikterdi iske qosý.
«Bıznes Stroı Kontrakt» JShS merdiger uıymy qalyńdyǵy alty santımetr asfalttyń birinshi qabatyn tósep jatyr. Búginde qum-qıyrshyq tas qospasy jáne qıyrshyq tas jabynyn tógý boıynsha jumystar júrýde. Jobaǵa sáıkes, merdiger jol boıyn jaryqtandyryp, trotýar salýy kerek», — dedi qala ákiminiń orynbasary Juldyzbek Bısembın.
Oblys ákiminiń aıtýynsha, Baýyrlastar-3 turǵyndary eldimekenge syıymdylyǵy úlken avtobýstar jiberýdi suraǵan.
«Qazir „PAZ“ úlgisindegi segiz avtobýs marshrýtta júr. Jaqynda qalaǵa taǵy 50 jańa avtobýs keledi. Olardyń bir bóligin osy baǵytqa shyǵarý qajet», — dep tapsyrdy óńir basshysy Ashat Shaharov qala ákimi Azamat Beketke.
Baýyrlastar-3 jolynyń qurylysyn merdiger kúzde aıaqtaýdy josparlap otyr. Jalpy uzyndyǵy — 1,8 shaqyrym.
Ákim Jumabek Táshenov kóshesindegi jol jóndeý jumystaryn da qarap shyqty.
Merdiger mekeme retinde tanylǵan «Atyraýınjstroı-AIS» JShS joldyń júrý bóligin keńeıte otyryp, uzyndyǵy 1,3 shaqyrym joldy kúrdeli jóndeýden ótkizýi tıis.
Eski asfalt jabynyn astyńǵy qabatyna deıin alyp tastaǵan. Qazir merdiger asfalttyń birinshi qabatyn tóseýge daıyndalyp jatyr, ony bir aptada aıaqtaýǵa ýádesin berdi.
Jóndeý jumystary júrip jatqan kezde, avtobýstar aınalma jolmen júrýde, bul halyqqa qolaısyzdyq týdyrady. Óńir basshysy jumys barysyn baǵamdap, jedeldetýdi tapsyrdy.
«Ózińiz ýáde etip otyrǵandaı, bir apta ishinde asfalttyń tómengi qabatyn salyp, joldy paıdalanýǵa berý kerek. Oqý jyly bastaldy, adamdar mektepke, jumysqa barady. Olarǵa jaǵdaı jasalýy tıis», — dep tapsyrdy ákim merdiger mekeme ókiline.