Aqtóbede jol jabylyp, úsh kúnnen beri dittegen jerine jete almaǵan júrgizýshiler ár jerge qonyp júr

<p>AQTÓBE. KAZINFORM — Ashat Shaharov jolda qalǵan kólik júrgizýshilerimen kezdesti. </p>

Búgin Hromtaý aýdanyna jumys saparymen jolǵa shyqqan oblys ákimi Ashat Shaharov Aqtóbeniń Bekqul baba turǵyn alaby mańynda jınalǵan kólik júrgizýshilerimen kezdesti.

Jospardan tys kezdesýde jeńil jáne júk kólikteriniń ıeleri aýa raıy qolaısyzdyǵynan týyndaǵan máselelerge narazylyǵyn bildirdi.

Olar úsh kúnnen beri oblys ortalyǵynan ońtústikke qaraı shyǵa almaı turǵanyn jetkizdi.

Óńir basshysy mán-jaıdy tolyqqandy biletinin, qarly borannyń saldary jeke baqylaýynda ekenin alǵa tartty.

«Tótenshe jaǵdaılar departamentiniń basshylyq quramymen birge Hromtaý aýdanyna jolǵa shyqtyq. Jolda sizderdiń jınalǵandaryńyzdy kórip, beı-jaı ótip kete almadym. Aýa raıy nasharlaǵan kezde „Samara-Shymkent“ respýblıkalyq avtojolynyń Hromtaý aýdanyndaǵy ýchaskesinde júk kólikteri jınalyp qalǵan. 12 júrgizýshi júk kóligin tastap ketken. Sondyqtan jaǵdaıdy jan-jaqty saralaý úshin Hromtaý aýdanyna baryp kelemin. Aqtóbege qaıtqanymda sizdermen qaıta kezdesemin», — dep atap ótti Ashat Shaharov.

Talap-tilekterin aıtyp, shý kótergen kólik júrgizýshileriniń birin oblys ákimi ózimen birge Hromtaý aýdanyna alyp ketti.

Bekqul baba turǵyn alaby arqyly ótetin respýblıkalyq mańyzy bar avtojolda Reseı Federatsııasy, Ózbekstan, Tájikstan, Qyrǵyzstan jáne elimizdiń azamattarynyń kólikteri tur.

Olardyń keıbiri aýyldaǵy № 76 orta mektepke tegin ornalastyrylyp, tamaqpen qamtylsa, endi biri kempıng, qonaq úılerde qonyp júr.

Eske sala keteıik, Aqtóbe oblysynda jabylǵan jolda 250 júk kóligi jınalyp qalǵanyn habarlaǵan edik.