Aqtóbede jol qurylysyna jaýapty basqarma basshysy qyzmetine saı bolmaı shyqty
Aqtóbede Ádep keńesiniń kezekti otyrysy ótti. Onda oblystyq jolaýshylar kóligi jáne avtomobıl joldary basqarmasynyń basshysyna qatysty is qaraldy.
«Taldaý jumystary barysynda Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr men «KTP» JShS arasynda Aqtóbe qalasyn ońtústik jaǵynan aınalyp ótý jolyn qaıta jańartý kezinde oryndalmaǵan jumysqa aldyn ala bıýdjet qarjysyn aýdaryp jiberilgeni kórsetilgen. 2017 jyldyń 16 qazanynda kelisimshart jasalǵan. Jumystyń oryndalýy 17 aı bolyp belgilengen. Osy shartqa sáıkes qosymsha uzartý, ıaǵnı, 2021 jyldyń 31 jeltoqsanyna dep kelisimshart jasalǵan. Bıyl naýryzda nysandy prokýratýra tekserip, 27,6 mln teńgeniń jumysy atqarylmaǵanyn bildi. Qujat boıynsha 8,9 mln teńgege syrtqy jaryqtandyrýǵa arnalǵan 340-tan astam bolat tirekter ornatý jumysy qabyldanǵan. Biraq jumys is júzinde iske aspaǵan. Sonymen qatar 28,1 mln teńgege 34 dana baǵdarsham dabyldamasyn ornatý kerek boldy. Munyń ishinde tek 8-i ornatylǵan. Al 18,7 mln teńgege 24 baǵdarsham dabyldamasyn ornatý jumysy atqarylmaǵan. Basqarma basshysy Aıbek Qaıyr prokýratýraǵa bergen túsiniktemesinde bul jumystar qys mezgiline tap bolǵandyqtan oryndaý múmkin emestigin jetkizgen. Vızýaldy tekserý jetkilikti, arnaıy saraptama qajeti joq dep sanaımyz», - dedi QR Memlekettik qyzmet isteri agenttigi oblystyq departamenti basqarmasynyń bas mamany Gúlhan Sısenbına.
Onyń aıtýynsha, jobany ishinara ózgertý hattamasy bar. Keıbir jumys qosylǵanymen, keıbiri qysqaryp qalady.
«Ońtústik aınalma jol jobasy 2017 jyldan bastap júzege asyrý kózdelgen. Biraq 2017-2018 jyldary qarjylandyrý bolmady. Sóıtip qarjylandyrý 2019 jyly bastaldy. Qyzmetke kirisken soń osy jobanyń barlyǵyn qaıta qarap shyqtym. Eks-basshysy Málimbet Ibrashevke qatysty kezinde tártiptik jaza qoldanylǵan. Ol 822 mln teńge qarjy artyǵymen tólengen. Máseleni sheshý úshin barlyq shara qabyldandy. Jumys atqaryldy. Asfalt tóseý jumystary jasaldy. Byltyr 1,4 mlrd teńgeniń jumysy atqaryldy. Aýdıtorlyq baqylaý da boldy. Prokýratýra vızýaldy qarady. Qurylys kezinde atqarylǵan jumysqa qatysty aktpen qatar, azaıtý, qosymsha jumys qosý bar ekenin eskertemin. Prokýratýra aıtyp otyrǵan jumystar sol kezde qysqartyldy. Qazirgi kezde joldyń begili bir bóligi qosylyp jatyr. Ony eskermegen. Al aýmaqtyń qurylysyna jaýapty «KTP» seriktestigine qatysty aryz túsirdik. «Memlekettik satyp alýtýraly» Zańnamasy aıasynda seriktestikke shara qoldaný qajet dep esepteımiz», - dedi Aıbek Qaıyr.
Ádep keńesi oǵan qyzmetine tolyq saı emes degen uıyǵarym berdi. Qazirgi kezde Ońtústik aınalma jolda áli de qurylys jalǵasyp jatyr.