Aqtóbede jol-kólik apatynan eki jolaýshy kóz jumdy
Oqıǵa búgin saǵat shamamen 15:15–te boldy. Qalanyń bir búıirindegi Ońtústik aınalma joldyń jıeginde turǵan júk kóliginiń tirkemesine jeńil kólik baryp soqtyǵysty.
— «Daewoo Nexia» avtokóliginiń 25 jastaǵy júrgizýshisi jol jıeginde turǵan «DAF» júk kóliginiń tirkemesine soqtyǵysqan. Jol-kólik oqıǵasy saldarynan jeńil avtokóliktiń jolaýshylary mert boldy. Er adam 49, áıel 47 jasta. Jol-kólik oqıǵasy faktisi boıynsha sotqa deıingi tergep-tekserý bastaldy, — dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, bıyl oblysta 427 jol-kólik oqıǵasy boldy. Saldarynan 87 adam kóz jumdy. Al 500-den astam adam jaraqat aldy. Jol-kólik oqıǵasyn azaıtý maqsatynda óńirde bıyl 2 467 qoǵamdyq baqylaý kamerasy, 94 apparattyq-baǵdarlamalyq kesheni ornatylyp jatyr. Sonymen birge 66 orynda kameralar testileý rejıminde iske qosyldy. Bári polıtsııanyń serverlik bazasyna qosylady.
— Jyl basynan beri mas kúıinde kólik júrgizgen 1 125 adam júrgizýshi kýáliginen aıyryldy. Qazirgi kezde synaq rejıminde jumys istep turǵan kameralardan júıeli túrde jyldamdyqty asyratyn júrgizýshiler anyqtalyp otyr. Bul kameralar ornatylǵan qalalarda jol erejesin buzý deregi tómendegen eken. Bizde de jaqsy nátıje beredi dep esepteımiz, — dedi oblystyq PD baspasóz qyzmetiniń jetekshisi Erbolat Sarqulov.