Aqtóbede jetim qalǵan balalar baspanaly boldy

 AQTÓBE. QazAqparat - Aqtóbede «Nurly jer» baǵdarlamasy aıasynda salynǵan 60 páterli turǵyn úı paıdalanýǵa berildi. Alǵa qalasynyń ortalyǵynda salynǵan úıden jetim balalar da páter aldy, dep habarlaıdy QazAqparat tilshisi.

 Aqtóbeniń Alǵa alǵa qalasynda búgin 5 qabatty turǵyn úı paılanaýǵa berildi. Barlyǵy 60 páterli turǵyn úı birneshe jyl boıy baspanasyz júrgen adamdarǵa bólindi. Kezekte turǵandar arasynda az qamtylǵan otbasy, jetim balalar men memlekettik, bıýdjettik mekemede jumys isteıtin adamdar bar.

«Alǵa balalar úıinen 2010 jyly shyqtym. Sodan beri páter kezeginde turmyn. Qazir óz otbasym bar, tórt balanyń anasymyn. Ózimdi baqytty sezinemin. Biraq búginge deıin óz úıim bolǵan joq. Búgin maǵan úsh bólmeli páter berdi. Úlken alǵysymdy bildiremin»,- dedi páter ıesi Olga Vasıleva.

Páter kiltin Aqtóbe oblysynyń ákimi Berdibek Saparbaev tabys etti. Barlyǵy 60 páterdiń basym bóligi halyqtyń áleýmettik jaǵynan álsiz tobyna, memlekettik qyzmetkerge tıesili boldy. Sonymen qatar, apatty úıde turǵan adamdar da páter aldy.

«Árbir adam úshin baspana qajet. Baspana bolsa bári bolady. «Nurly jol», «Nurly jer» baǵdarlamalary arqyly elimizde turǵyn úı salynyp jatyr. Memleket basshysy Nursultan Nazarbaevtyń tapsyrmasymen iske asyrylyp jatqan baǵdarlama qazaqstandyqtardy pátermen qamtamasyz etýge baǵyttalǵan. Ótken jyly 40-50 jylda bolmaǵan kórsetkishke qol jetkizip, oblys boıynsha 793 myń sharshy metr páter berildi. Bul - Aqtóbeniń 6800 turǵyny páterli boldy degen sóz. Alǵa aýdanynda da sońǵy 20 jylda mundaı qurylys júrmegen. Búgin 60 páterli úı berildi»,- dedi Aqtóbe oblysynyń ákimi Berdibek Saparbaev.

Aıta keteıik, Aqtóbeniń Alǵa aýdanynda 1500-den astam adam páter kezeginde tur.