Aqtóbede jergilikti jartylaı fabrıkattar joǵary suranysqa ıe

AQTÓBE. QazAqparat – Aqtóbe qalasy men óńir turǵyndary jergilikti seriktestik óndiretin jartylaı fabrıkat ónimin satyp alýdy jón sanaıdy.

Kompanııa alǵashy kezde «Damý óndiris» baǵdarlamasy arqyly nesıe rásimdep, kásibin jandandyrdy, dep habarlaıdy QazAqparat tilshisi.

Jartylaı fabrıkattar daıyndaıtyn seriktestik óz jumysyn 1998 jyly bastady. Alǵashynda shaǵyn tseh jumys istep, keıin zamanaýı apparattar satyp alyndy. Qazirgi kezde «Geba» JShS-niń ónimi tek oblysqa emes, elimizdiń ózge de óńirine jetkizilip jatyr. Sóıtip 2019 jyly kompanııa óz qýaty artyp, táýligine 10 tonna ónim shyǵarý múmkindigine ıe boldy.

«Qazaqstandyq ónimdi bizdiń seriktestikten tabýǵa bolady. Munda jartylaı fabrıkattyń 40 túri bar. Túshpara, tartylǵan et, kotlet sekildi et jáne et ónimderi esh qospasyz tutynýshyǵa jetkiziledi. Sondyqtan bolar, bizdiń ónim sapasyna senim artyp, satyp alatyndar qatary jyl ótken saıyn artyp keledi»,- dedi kompanııa dırektory Janzııa Kadırova.

Kompanııa «Damý óndiris» baǵdarlamasy arqyly nesıe aldy. Bul qarjy aınalymǵa qoldanyldy.

«Seriktestikte 70 adam jumys isteıdi. Naryqta óz orny bar, taýar sapasy básekege qabiletti. Kásipker memlekettik qarjyny tıimdi jumsap, óńir ekonomıkasynyń damýyna úles qosyp otyr. Bul – jergilikti ónim. Óz taýarymyzdy qoldaý úshin tutynýshylar da jıi satyp alady», - dedi «Damý» kásipkerlikti damytý qory» AQ AOF menedjeri Baýyrjan Darqulov.

Statıstıkaǵa súıensek, byltyr «Damý» qory arqyly 500-ge jýyq joba sýbsıdııalandy. Nátıjesinde ekinshi deńgeıli bankter 18 mıllıard teńgege jýyq qarjy bólgen. Sonymen birge kepildik berilgen joba sany 500-den asady. Bıyl birinshi toqsanda «Damý» qory oblys boıynsha 496 jobany sýbsıdııalady. Quny - 8 mıllıard teńge. Sonymen birge 400-den astam jobaǵa kepildik berilgen.