Aqtóbede jer telimi berilgen turǵyn úı alaptaryna ınjenerlik jeliler tartylyp jatyr

AQTÓBE. QazAqparat – Aqtóbede turǵyn úı alaptaryn sý, jaryq, gazben jabdyqtaý jumysy júrip jatyr, dep habarlaıdy QazAqparat tilshisi.

Aqtóbe oblysynyń ákimi Ońdasyn Orazalın búgin qalanyń damý barysymen tanysty. Sý, jaryq, gazben qamtý jáne jol jóndeý jumystaryn kórdi. Qaladaǵy Shyǵys-1 turǵyn úı alabyna ınjenerlik jeliler tartylyp jatyr. Jyl sońyna deıin 1612 jer telimi gazben jáne elektr jelisimen qamtylýy kerek. Búginde jumys 50 paıyzǵa oryndaldy, onyń ishinde 2 myń elektr baǵanasy ornatyldy. Qurylys qazan aıynda aıaqtalady dep josparlanyp otyr.

«Aldymen úı salynyp, adamdar turyp jatqan aýmaqtar kommýnıkatsııamen qamtamasyz etilýi kerek», - dep tapsyrdy Ońdasyn Orazalın. Qazirgi tańda Shyǵys-1 turǵyn úı alabyndaǵy sý qubyry jelileriniń qurylys jobasy da ázirlenip jatyr.

Aıta keteıik, Aqtóbe qalasynda barlyǵy 53 turǵyn úı alaby bar. Olardyń kóbinde jer telimi sońǵy jyldary ǵana berildi. Qazirgi tańda qalada 7 turǵyn úı alabyn gazben, onyn elektr togymen, úsheýin aýyz sýmen qamtý úshin qurylys jumystary júrgizilip jatyr. Qalalyq turǵyn úı-kommýnaldyq sharýashylyq bóliminiń málimetinshe, 2023 jyldyń sońyna deıin barlyq turǵyn úı alaptary gazben jáne jaryqpen qamtylady, tek 15-inde sýmen qamtý máselesi ózekti bolyp qalady.

«Sarybulaq – Moıseevka» jer asty sý qoryn ıgerý jumystary júrgizilip jatyr. Bul joba júzege asqanda sý máselesi jabylady», – deıdi turǵyn úı-kommýnaldyq sharýashylyq bóliminiń basshysy Baıtursyn Óksikbaev.

Sondaı-aq, oblys ákimi Aqtóbe qalasy Táýelsizdik dańǵylyn 8 jolaqqa jáne Batys-2 shaǵyn aýdanyndaǵy M.Shoqaı atyndaǵy kósheni 6 jolaqqa deıin keńeıtý jumystarynyń barysymen tanysty. ​ Kúzde balalar sabaqqa esh kedergisiz barýy úshin kóshelerindegi kólik qozǵalysyn tamyz aıynyń sońyna deıin qalpyna keltirý kózdeldi. Al joba keler jyly tolyq qoldanysqa beriledi. Sondaı-aq jol boıyna jaıaý júrginshilerge arnalǵan oryndardy ornalastyrý, jaryqtandyrý baǵandaryn ornatý qarastyrylǵan.

Oblys ákimi Ońdasyn Orazalın qalanyń eski bóligindegi, onyń ishinde Matrosov kóshesindegi turǵyn úılerdiń qasbetin syrlaý, aǵaıyndy Jubanovtar kóshesi boıyndaǵy 200 úıdiń aýlasyn abattandyrý jumystarymen tanysty. Merdiger aýlany jóndeý jumystary kezinde turǵyndardyń tilegin eskerdi. Máselen, jaıaý júrginshiler joly men avtoturaq alańdaryn retke keltirý týraly sheshim qabyldandy.