Aqtóbede jemqorlardan óndirilgen qarjyǵa mektep salyndy

AQTÓBE. QazAqparat – Aqtóbe obylsy Muǵaljar aýdanyndaǵy Qumjarǵan orta mektebi paıdalýǵa berildi. Birneshe jyl boıy qurylysy turalap qalǵan bilim ordasyn paıdalanýǵa berý úshin jemqorlardan óndirilgen qarjy jumsaldy, dep habarlaıdy QazAqparat tilshisi.

Al búgin bilim ordasy qoldanysqa berildi. Alyshý saltanatyna Aqtóbe oblysynyń ákimi Eraly Toǵjanov, Sybaılas jemqorlyqqa qarsy qyzmet departamenti basshysynyń mindetin ýaqytsha atqarýshy Esqalı Salamatov jáne Qumjarǵan aýylynyń turǵyndary qatysty. Bul bilim ordasy 60 oryndyq.

«Byltyr aýyl halqynyń ál-aýqatyn arttyrýǵa arnalǵan «Aýyl amanaty» jobasy bastaldy. Jobany qarjylandyrýǵa 6 mlrd teńgeden astam qarajat bólindi. Sondaı-aq, biz «BІLІM ALL» óńirlik jobasyn birinshi bolyp iske qostyq. Onyń aıasynda oblys boıynsha 10 myńnan astam oqýshy, onyń ishinde Qumjarǵan negizgi mektebiniń 50 oqýshysyn Aqtóbeniń úzdik pedagogteri oqytady. Sonymen qatar, densaýlyq saqtaý salasyn damytý, medıtsınalyq mekemelerdiń halyqqa qoljetimdi etý jáne medıtsınalyq qyzmetterdiń sapasyn arttyrý, ınfraqurylymdy damytý máseleleri sheshilýde. Aýyldaǵy árbir turǵyn mańyzdy», - dep atap ótti Eraly Toǵjanov.

Al Esqalı Salamatov el Prezıdenti Qazaqstan halqyna Joldaýynda sybaılas jemqorlyqtan tárkilengen qarajatty mektep salýǵa baǵyttaýdy tapsyrǵanyn alǵa tartty. Atalǵan tapsyrmany oryndaý maqsatynda Qazaqstanda alǵash ret Qumjarǵan aýylynda orta mektep paıdalanýǵa berildi. Onyń qurylysyna sybaılas jemqorlyqqa qatysty qylmystyq isterdi tergeý kezinde ótelgen qarjy paıdalanyldy. Qurylysy uzaqqa sozylǵan jobany aıaqtaýǵa 150 mln teńge jumsaldy.

Áleýmettik nysannyń qurylysy 2018 jyly bastalǵan. Biraq ártúrli sebepterge baılanysty qurylys-montaj jumystary toqtap qalǵan. Mektep qurylysy 2022 jyly qaıta qolǵa alynyp, bıyl aıaqtaldy.

Eske salsaq, Qumjarǵandaǵy orta mektep qurylysy shamamen 5 jyl buryn toqtap qalǵan.

FOTO: Aqtóbe oblysy ákiminiń baspasóz qyzmeti.