Aqtóbede «Jaıly mektep» jobasy aıasynda salynatyn 18 mekteptiń 14-i bıyl qoldanýǵa beriledi
«Jaıly mektep» jobasy aıasynda oblysta barlyǵy 18 mektep salynady. Onyń 14-i bıyl jyl sońyna deıin qoldanýǵa beriledi. Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaevtyń aıtýynsha, salynatyn 18 mekteptiń 13-i Aqtóbe qalasynda ornalasady. Sebebi oblys ortalyǵynda oryn tapshylyǵy arta túsken.
«Jaıly mekteptiń» eń basty maqsaty – úsh aýysymdy, oryn tapshylyǵy bar jáne apatty mektep máselesin sheshý. Bıyl 14 mekteptiń qurylysy bastaldy. Olar Aqtóbe qalasy men Temir, Shalqar, Mártók aýdandarynda. Ulttyq qordan 90 mlrd teńgege jýyq qarjy bólindi. Jańa oqý jylyna deıin 300, 600, 900 oryndyq 10 mektep qoldanysqa beriledi, al ózge tórteýinde qurylys jyl sońyna qaraı aıaqtalady. Qurylysy uzaqqa sozylatyny 2 myń oryndyq mektepter»,- dedi Aqtóbe oblystyq qurylys, sáýlet jáne qala qurylysy basqarmasy basshysynyń orynbasary Aslan Jarasbaev.
Aqtóbe qalasyndaǵy oryn tapshylyǵy máselesin sheshý úshin mektepterge japsarlas ǵımarat salynyp jatyr. Byltyr №14, 12, 23 mektep janynda qurylys júrdi. Bıyl №8, 60, 51, 49, 47 mektepterge japsarlas ǵımarat salynady.
- Qazirgi tańda bilim salasyna qatysty 44 nysannyń qurylysy júrip jatyr. Onyń ishinde mektep, japsarlas qurylys, balabaqsha bar. Aýdandarda apatty, eski mektepter bolsa, qalada kóbine úsh aýysymdy mektep máselesin sheshý joly qarastyrylǵan. 2025 jyly óńirdegi mektep máselesi túgel sheshiledi, - dedi Aslan Jarasbaev.