Aqtóbede jat aǵymda júrgender 57 qylmys jasaǵan

AQTÓBE. QazAqparat – Jyl basynan beri jat aǵym jeteginde júrgender 57 qylmys pen 400-ge jýyq ákimshilik quqyqbuzýshylyq jasaǵan. Bul týraly oblystyq polıtsııa departamenti málimdedi, dep habarlaıdy QazAqparat tilshisi.

«Qylmystyq isterdiń 13-i dinı, 30-y kóshi-qon, 11-i salyq salasyna qatysty quqyqbuzýshylyq kezinde tirkeldi. Máselen, qala turǵynyn tintý kezinde 10 dinı kitap tabyldy. Ákimshilik quqyqbuzýshylyq kodekstiń 453 baby 4 bólimi boıynsha oǵan 252 myń teńge aıyppul salyndy. Jat aǵym jeteginde júrgender dindi jamylyp, qylmys jasaıdy, urlyqqa, adam óltirýge barady. Qaraqshylyq shabýyl jasaǵandary da bar. Máselen, qala turǵyny ashyq túrde telefon urlap aldy. Jedel izdestirý kezinde 23 jastaǵy destýktıvti aǵymda júrgen kúdikti ustaldy. Qazirgi kezde osy oqıǵa boıynsha sottalýshy óz jazasyn aldy», - dep habarlady oblystyq PD baspasóz qyzmeti.

Aqtóbe polıtsııasy 21 jastaǵy jigitti atyp, mert qylǵan qala turǵyny da jat aǵymda júrgen kúdikti dep esepteıdi.

«Taǵy bir derek boıynsha 31 jastaǵy kúdikti qazan aıynda qala túrǵynynan 340 myń teńge urlap ketken. Kúdikti dereý ustaldy. Qazir osy oqıǵa boıynsha Qylmystyq kodekstiń «Urlyq» babymen is qozǵalyp, tergeý júrip jatyr. Ol da destrýktıvti aǵymda júrgen», - dedi oblystyq PD baspasóz qyzmeti.