Aqtóbede «Jasyl el» jastary marapattaldy

AQTÓBE. QazAqparat – Aqtóbede bıyl «Jasyl el» jasaǵy quramynda myńnan astam jas eńbek etti. Olardyń 32-i Nur-Sultan qalasynda demalýǵa joldama aldy, dep habarlaıdy QazAqparat tilshisi.

Aqtóbe oblysy boıynsha jaz aılarynda myńǵa jýyq belsendini jumyspen qamtý josparlandy. Jospar oryndaldy, 1 050 bala eńbekke aralasty. Sonyń ishinde 730 adam Aqtóbe qalasynanda, 320 adam 12 aýdanda eńbek etti. Olardyń eńbekaqysyna 74 mln teńge bólinip, ıgerildi.

«2022 jyly bul baǵyttaǵy jumys jalǵasady. 1200 jasty jumyspen qamtý josparda bar. Bıyl 70 myń teńgeden astam eńbekaqy alsa, keler jyly 85 myń teńge bolady. Bul jastarǵa kerek. Jumys istep, eńbekke aralasty, sonymen birge baıqaýlarǵa qatysyp, bir-birimen tanysty, dostarynyń qataryn kóbeıtti», - dedi oblystyq ishki saıasat basqarmasynyń basshysy Lázzat Orazbaeva.

Jaýyngerler aǵash egip, gúlzarlardyń kútimin jasady. Qoqys jınap, qurylys jumystaryna kómek berdi. «Úzdik komandır» nomınatsııasyn Quralaı Baqytkereeva, «Úzdik joǵarǵy oqý orny» nomınatsııasyn «Q.Jubanov atyndaǵy Aqtóbe óńirlik ýnıversıteti», «Úzdik arnaıy oqý orny « nomınatsııasyn Báıishev joǵary medıtsınalyq kolledji ıelendi. Shalqar aýdany «Úzdik aýdan» nomınatsııasyn aldy. Al «Batys-Aqtóbe» basqarýshy kompanııasy «Úzdik jumys berýshi» atandy. Barlyǵy 32 stýdent Nur-Sultan qalasyna joldama aldy.

«Olar úsh kún boıy Nur-Sultan qalasynda qydyryp, demalady. Jastar óte belsendi. Bul baǵyttaǵy jumys ári qaraı jalǵasady», - «Atameken» qurylys jasaǵynyń tóraǵasy Nurlybek Mýsın.