Aqtóbede «Jastar arenasy» sport kesheni paıdalanýǵa berildi
Marat Ospanov atyndaǵy Batys Qazaqstan memlekettik medıtsınalyq ýnıversıtette «Jastar arenasy» sport kesheni paıdalanýǵa berildi. Keshenniń ashylýyna ýnıversıtette bilim alǵan transplantatsııa jónindegi respýblıkalyq úılestirý ortalyǵynyń jetekshisi Jaqsylyq Dosqalıev te qatysty. Sonymen qatar oblys ákimi Ondasyn Orazalın, álem chempıondary Galıb Jafarov, Baqtybaı Qısyqov keldi.
Aıta keteıik, sport kesheni Tuńǵysh Prezıdent Nursultan Nazarbaevtyń buqaralyq sportty damytý maqsatynda Qazaqstanda 100 fıtnes ortalyq salý tapsyrmasy aıasynda ýnıversıtettiń jeke qarjysyna salyndy.
«Elbasy Jastar jyly dep jarııalap, sonyń aıasynda kóptegen ıgi ister uıymdastyrylyp jatyr. Aqtóbe qalasynyń 150 jyldyǵy qarsańynda da jastarǵa arnalǵan shara uıymdastyrylýda. Medıtsınalyq ýnıversıtet bolsa stýdentterge arnap dene shynyqtyrý ortalyǵyn saldy. Stýdentter úshin basty mindet oqý, oǵan demalysty da qatar alyp júrý kerek. Jastar ortalyǵynyń ashylýy qýanyshty jaǵdaı», - dedi oblys ákimi Ońdasyn Orazalın.
Jastar arenasynyń qurylysy 2018 jyly bastalyp, bıyl iske qosyldy. Keshende sport zaldary, uzyndyq pen bıiktikke sekirýge alańy, fýtbol alańy, júgirý joly jáne ártúrli sektor bar. 18-22 sáýirde «Jastar arenasynda» Qazaqstan Respýblıkasynyń X-jazǵy ýnıversıadasy aıasynda kúresten jarys ótti. Baıqaýǵa Qazaqstannyń joǵary oqý oryndarynyń 15 komandasynan 130-ǵa jýyq stýdent qatysty. Medıtsınalyq ýnıversıtette 3 sport zaly, 1 kúres zaly, gımnazııa zaly, aýyr atletıka alańy, arnaýly medıtsınalyq toppen jattyǵý úshin shaǵyn zal, shańǵy bazasy bar. Qazirgi ýaqytta bul joǵary oqý ornynda 20-dan astam sport túriniń 26 sektsııasy jumys isteıdi.