Aqtóbede jarylǵysh zat qoıylǵany týraly jalǵan habar bergen oqýshynyń bostandyǵy shekteldi

ASTANA. QazAqparat - Jarylǵysh zat týraly jalǵan habarlama bergen oqýshyǵa Aqtóbe qalasynyń kámeletke tolmaǵandar isteri jónindegi aýdanaralyq soty úkim shyǵardy. 10-synyp oqýshysynyń 6 aıǵa bas bostandyǵy shekteldi, – dep habarlaıdy Polisia.kz saıtyna silteme jasap.

2022 jyldyń mamyr aıynda Aqtóbe oblysy polıtsııa departamentiniń elektrondyq mekenjaıyna joǵary oqý oryndarynyń ǵımarattaryna jarylǵysh qurylǵylardyń qoıylǵany týraly habarlama tústi. Atalǵan mekenjaılarǵa dereý barlyq shuǵyl qyzmetter, saperlar men qyzmettik ıtterimen kınologtar jiberildi. Oqý oryndarynyń personaly men oqýshylary evakýatsııalandy. Tekserý barysynda jarylǵysh zattar tabylǵan joq. Aqtóbe oblysy polıtsııa departamentiniń ekstremızmge qarsy is-qımyl basqarmasynyń qyzmetkerleri jedel is-sharalar júrgizý barysynda Batys Qazaqstan oblysyndaǵy mektepterdiń birinde 10-synyp oqýshysyn anyqtady. Oqýshy óz kinásin moıyndap, túsinikteme berdi. Polıtseıler kompıýterdi tárkiledi. Sonymen qatar, atalǵan oqýshy osyndaı elektrondyq hatty Kókshetaý qalasyna da joldap, úsh sot ǵımaratyna jarylǵysh zat qoıylǵany týraly habarlaǵany anyqtaldy.

Osy jyldyń mamyr aıynda Aqtóbe qalasynyń kámeletke tolmaǵandar isteri jónindegi aýdanaralyq sotymen úkim shyǵarylyp, kámeletke tolmaǵan kúdikti kináli dep tanyldy. Oǵan qatysty 6 aıǵa bas bostandyǵyn shekteý túrindegi jaza taǵaıyndaldy.