Aqtóbede jańbyr jaýǵanda asfalt tósegen merdiger sebebin túsindirdi

<p>AQTÓBE. KAZINFORM - Aqtóbe qalasy Marat Ospanov kóshesinde jol jóndep jatqan merdiger jańbyr kúni de jumysyn toqtatpady. Olar asfalt jabyndysyna qajetti qospanyń sol ýaqytta daıyn bolǵanyn, aýa raıy boljamynda jańbyr jaýatyny kórsetpegenin, 5 jyldyq kepili bar ekenin aıtty.</p>

Aqtóbe qalasynda jol jóndeý jumystary áli aıaqtalǵan joq. Merdigerler bıylǵy jospardy oryndaý úshin aıaz túskenshe qurylys júrgize bermek. 

Foto: Altynaı Saǵyndyqova/Kazinform

«Aqtóbe qalasynda 15 kóshege ortasha jóndeý júrgizý kelisimsharty bar. Joba keler jyly maýsym aıynda bitedi. Salyp jatqan jolǵa 5 jyldyq kepildik beremiz. Jabyndysy búlinse, úgitilse, jarylyp ketse óz qarjymyzǵa jóndep, qalpyna keltiremiz. Keshe jańbyr jaýǵanda jol saldy dep aıtyp jatyr. Qospa tóseldi, katok júrgen kezde jańbyr jaýdy. Negizi katok júrgen kezde de sý tamshylap turýy kerek. Ol jabysyp qalmaý úshin qajet. Biz aýa raıyna qarap turamyz. Ol kezde jańbyrdyń jaýatynyn kórsetpegen edi», - dedi «Atyraýınjstroı-AIS» JShS bas dırektorynyń orynbasary, bas merdiger Bólek Almenbaev.

Ondaǵan jyldyq tájirıbesi bar ınjener qurylysshy aıazdy kúni, jańbyr jaýǵanda jol salýǵa bolmaıtynyn aıtty. Eger jol sapasy talapqa saı bolmasa frezerlep, qaıta tóseıdi. 

Foto: Altynaı Saǵyndyqova/Kazinform

Eske salsaq, Aqtóbe oblysynyń joldaryn jóndeýge bıyl 70 mlrd teńgege jýyq qarjy bólindi.