Aqtóbede jan sany 250 adamnan asatyn aýyldarǵa ınternet tartylyp jatyr
Alǵa aýdany, Qaraqobda aýylyna keń jolaqty ınternet jelisi tartylyp jatyr. Mundaǵy turǵyndar kóp uzamaı ǵalamtorǵa esh kedergisiz kirip, shalǵaıdaǵy et jaqyndarymen baılanysqa shyǵa alady. Qaraqobda aýylynda 500-ge jýyq adam turady. Turǵyndar ortalyqtandyrylǵan aýyz sýdy tutynyp, kógildir otynnyń qyzyǵyn kórip otyr. Taıaýda aýylǵa keń jolaqty ınternet iske qosylsa, mundaǵy ómirdiń qaladan esh aıyrmasy bolmaıdy Bul turǵyndar tilegi boıynsha Nur Otan partııasynyń «Ózgerister joly: ár azamatqa laıyqty ómir!» atty saılaýaldy baǵdarlamasyna enip, arnaıy daıyndalǵan Jol kartasy boıynsha júzege asyldy. Qujatta kórsetilgen ındıkator boıynsha halyq sany 250-den asatyn 97 aýylda 3G mobıldi keń jolaqty ınternetpen qamtylady. Qazir sonyń 91-i júzege asty. Jospardyń oryndalýyn oblystyq máslıhat depýtattary, ıaǵnı, osy partııanyń fraktsııa músheleri baqylaýǵa alǵan.
«Internet jelisin qondyrsa, balalarymyzben beınebaılanys arqyly erkin sóılesip, qasynda bolǵandaı áser alamyz. Tehnıkanyń jetistigi bizge jetkenine qýanyshtymyz», - dedi aýyl turǵyny Larısa Aýdanbaeva.
Jalpy Alǵa aýdanyndaǵy aýyldardyń 70 paıyzynda ınternet bar. Jyl sońyna deıin mejeni 75-80 paıyzǵa jetkizý josparlanyp otyr. Bul is negizinen demeýshilerdiń kómegimen júzege asyp, aýdan bıýdjetinen azdaǵan qarajat bólinedi.