Jaldamaly páterinde blefaroplastıka jasap, patsıenttiń kózin zaqymdaǵan «dáriger» aıyppul tóledi

<p>AQTÓBE. KAZINFORM — Aqtóbe turǵyny jaldamaly páterinde klıentiniń kózine eki márte blefaroplastıkalyq ota jasap, munyń sońy aýyr zardapqa ákelip soqty. Aıypker 1 mln 235 myń teńge ótemaqy tóleýge májbúr boldy. </p>

Aqtóbe qalalyq sotyna úıde blefaroplastıka jasatqan soń qabaǵy jarylǵan azamatsha materıaldyq jáne moraldyq zalal óndirý úshin júgingen.

Instagram áleýmettik jelisinde blefaroplastıka qyzmeti týraly jarnamany kórgen talap qoıýshy 2023 jyldyń 4 tamyzynda jaýapkerdiń jaldamaly páterinde ota jasatqan.

Operatsııadan keıin bir apta ótken soń talap qoıýshy kózdiń assımetrııasyn baıqap, jaýapkerge qaıta habarlasyp, 15 tamyzda ekinshi ret ota jasatady.

Ekinshi ota kezinde jaýapker oń kózi qabaǵanyń terisin tym tereń kesken jáne terisimen birge tómengi kirpikterdi kesip tastaǵandyqtan, talap qoıýshydan qan ketýi toqtamaǵan.

Jaýapker jarany lazermen kúıdirip, qandy toqtatyp, qan ketken jerdi tigip tastaǵan.

Talap qoıýshy konıýnktıvıt, aýyrsyný jáne jas aǵý saldarynan oftalmolog pen plastıkalyq hırýrgtarǵa júginýge májbúr bolǵan.

Qazirgi ýaqytta qabaqtyń tolyq jabylmaýyna, kózdiń jáne qabaqtyń únemi isýine baılanysty patsıenttiń syrtqy kelbeti ózgergendikten talap qoıýshy jumysty tastap, sátsiz jasalǵan otadan keıin emdeý jáne ońaltý shyǵyndaryn kóterýge májbúr bolǵan.

Sot isti qaraý kezinde jaýapkerdiń aýrýhanada feldsher bolyp jumys isteıtinin, onyń plastıkalyq hırýrgııa boıynsha lıtsenzııasy joqtyǵyn, tek sertıfıkaty bar ekenin anyqtady.

Jaýapker talap qoıýshyǵa ota jasaýǵa jumsalǵan 80 myń teńgeni óz erkimen qaıtarǵan.

Sot sheshimimen jaýapkerden talap qoıýshynyń paıdasyna 235 myń teńge materıaldyq shyǵyn jáne 1 mln teńge moraldyq zııan óndirildi.

Sot sheshimi zańdy kúshine endi.

Eske sala keteıik, elimizde lıtsenzııasyz plastıkalyq ota jasaǵan adamdarǵa birqatar jaza qarastyrylǵan. 

Ondaı jaǵdaıda Ákimshilik quqyq buzý týraly kodekstiń 424-baby boıynsha jeke tulǵalarǵa 5 AEK (18 460 teńge), laýazymdy adamdarǵa 15 AEK (55 380 teńge), zańdy tulǵalarǵa 20 AEK-ten (73 840 teńge) 70 AEK (258 440 teńge) deıin aıyppul salynady.  

Densaýlyqqa ortasha jáne aýyr dárejede zııan keltirgeni úshin qylmystyq jaýapkershilik kózdelgen.

Sońǵy 5 jylda plastıkalyq ota jasaýshylardyń ústinen 39 shaǵym túsken.