Aqtóbede zardap shekkenderge barlyq medıtsınalyq kómek kórsetilýde

ASTANA. QazAqparat - Aqtóbe qalasynda oryn alǵan tótenshe jaǵdaıǵa baılanysty zardap shekken azamattarǵa qajetti barlyq medıtsınalyq kómek kórsetilýde, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

5 maýsymda ekstremıstik toptyń Aqtóbe qalasyndaǵy «Pallada» jáne «Pantera» qarý-jaraq dúkenine, sonymen qatar QR ІІM Ulttyq gvardııasynyń №6655 bólimine jasaǵan shabýyly nátıjesinde zardap shekken adamdar barlyq qajetti jedel ári dárilik em qabyldaýda.

Aýyr jaraqattanǵan adamdarǵa 5 maýsym kúni Astana qalasynan Aqtóbege quramynda dáriger-reanımatolog, tamyrlar hırýrgy, neırohırýrg, tarakaldy hırýrg, jalpy hırýrg jáne travmatolog dárigerleri bar Respýblıkalyq sanıtarlyq avıatsııa ortalyǵynyń brıgadasy bardy. Astanalyq mamandar ota jasaýǵa kómektesip, patsıentterdi ári qaraı emdeý boıynsha keńes berdi.

Aqtóbe oblystyq Densaýlyq saqtaý basqarmasynyń málimetinshe, 2016 jylǵy 6 maýsym 15 saǵat 30 mınýt ýaqytyndaǵy jaǵdaıǵa sáıkes zardap shekken adamdardyń  19-sy statsıonarlyq em qabyldaýda. Onyń ishinde 16 adam jedel medıtsınalyq kómek aýrýhanasyna (3 patsıenttiń jaǵdaıy óte aýyr, 13 patsıenttiń jaǵdaıy ortasha aýyr deńgeıde), 3 adam Aqtóbe oblystyq aýrýhanasyna jatqyzyldy (1 patsıent óte aýyr jaǵdaıda, 2 patsıenttiń jaǵdaıy ortasha aýyr deńgeıde).

15 adam ambýlatorlyq em qabyldaýda.

Patsıentterdiń jaǵdaıyn QR DSÁDM únemi baqylaýǵa aldy.