Aqtóbede ydys-aıaq jýýǵa arnalǵan gýbka shyǵaratyn tseh órtenip jatyr
Órt saǵat 21:11-de Aqtóbe qalasy 41-razezd aımaǵyndaǵy tsehtan shyqty. Onda ydys jýýǵa arnalǵan gýbka shyǵarylady.
«Óndiris tsehynan órt shyqqany týraly aqparat 112 qyzmetine tústi. Órtti sóndirýge 47 adam jáne 9 tehnıka jumyldyryldy. Oqıǵa ornyna barǵan kezde óndiris tsehyndaǵy shatyrdyń janyp jatqany anyqtaldy. Adam zardap shekken joq. Qazir órt sóndirý jumystary jalǵasyp jatyr. Qutqarýshylar órttiń basqa da ǵımarattarǵa taralýyna jol bermedi, qaýip joq»,- dep habarlady oblystyq TJD baspasóz qyzmeti.
Eske salsaq, Aqtóbe oblysy Alǵa qalasynda qurǵaq shóp janyp, saıajaı aýmaǵyna tarap ketti. Barlyǵy 10 úı órtendi.
Oqıǵa ornyna jetken órt sóndirýshiler jalyn saıajaı úılerine tarap jatqanyn anyqtaǵan.
«Saıajaı aýmaǵynda 59 úı bar. Onyń 10-y órtendi. Bul úılerde adam turmaıdy, tek baý-baqsha daqyldary egiledi. Zardap shekkender joq. Órtti sóndirýge Tótenshe jaǵdaılar departamentinen 26 adam jáne 5 tehnıka jiberildi. Al jergilikti atqarýshy organdardan 10 adam men 3 tehnıka jumyldyryldy», - dep habarlady oblystyq TJD baspasóz qyzmetinen.