Aqtóbede volonter memqyzmetshiler qarttar úıiniń turǵyndaryna kómektesti
Elimizde Memlekettik qyzmet isteri agenttigi Volonter jyly aıasynda Memleket basshysynyń korporatıvtik eriktilikti damytý bastamasyn qoldap, birqatar jumysty qolǵa aldy. Aqtóbe oblystyq memlekettik qyzmet isteri departamenti bul isten shet qalmady. Búgin memlekettik qyzmetshiler áleýmettik qyzmet kórsetý ortalyǵyna baryp, turǵyndarǵa keńes berdi, quqyqtyq kómek kórsetti. Alǵys aıtý kúni qarsańynda zańgerler, dárigerler, Halyqqa qyzmet kórsetý ortalyǵynyń mamandary bardy.
«Ádilet departamenti, densaýlyq saqtaý basqarmasy, Memlekettik basqarý akademııasynyń oblystyq fılıaly jáne «Azamattarǵa arnalǵan úkimet» MK basshylyǵyna qoldaý kórsetkeni úshin alǵys bildiremiz. Biz qaıyrymdylyq kómekti azyq-túlik, kıim jáne taǵy da basqa zatty syılaý men jetkizýge baılanystyramyz. Alaıda keńes berý - quqyqtyq kómekke muqtaj azamattar sanaty da bar. Qarapaıym suraqtarǵa jaýap alý úshin belgili bir mekemege jeta almaıtyndar da bar. Biz osy sanatty nazardan tys qaldyrǵymyz kelmedi», - dep atap ótti departament basshysynyń orynbasary Rafhat Bısenov.
Іs-shara barysynda Memlekettik basqarý akademııasy fılıalynyń lektorlary urys-keristiń aldyn alý, kóńil-kúıdi basqarýǵa qatysty trenıng ótkizdi. Halyqqa qyzmet kórsetý ortalyǵynyń mamandary zeınetaqymen qamsyzdandyrý, áleýmettik jeńildikter jáne múmkindikteri shekteýli azamattarǵa arnalǵan memlekettik qyzmet salasyndaǵy zańnamanyń sońǵy ózgeristeri týraly aqparat berdi. Zańgerler muragerlik jáne jyljymaıtyn múlikti tirkeý máselelerine oraı túrli daýǵa qatysty quqyqtyq kómek kórsetti.
Aıta keteıik, departament qyzmetkerleri ortalyq janynan qurylǵan halyq aspaptar ansambline 2 dombyra syıǵa tartty.