Aqtóbede voleıboldan Qazaqstan kýbogynda shırek fınalǵa shyqqan komandalar anyqtaldy

<p>AQTÓBE. KAZINFORM &ndash; Aqtóbe qalasynda voleıboldan erler komandalary arasynda Qazaqstan kýbogynyń toptyq básekeleri máresine jetip, shırek fınalǵa shyqqan juptar belgili boldy.&nbsp;</p>

A tobynda «Atyraýǵa» teń keler qarsylas bolmady. Atyraýlyqtar «Esil» (SQO), «Býrevestnık» (Almaty) jáne «Taraz» komandasyn 3:0 esebimen jeńdi. Osylaısha olar shırek fınalda B tobynda tórtinshi oryn alǵan «Jetisý» klýbymen kezdesetin boldy. 

B tobynda «Jetisý», «Pavlodar» jáne «Jaıyqty» 3:2 esebimen qapy qaldyrǵan alań ıeleri úzdik shyqty. Aqtóbelikter shırek fınalda «Esilmen» sheberlik baıqasady. 

Ótken jylǵy el kýbogynyń ıegeri «Pavlodardan» 3:0, «Jetisýdan» 3:1 esebimen aılasyn asyrǵan Oraldyń «Jaıyǵy» jartylaı fınalǵa shyǵý úshin «Býrevestnıkpen» talasady.

«Jaıyqtyń» bas bapkeri Vıktor Kozık 2022 jyly «Atyraýǵa» kýbokty alyp bergen edi. Al «Pavlodarmen» ótken jyly dál osyndaı tabysqa qol jetkizgen Igor Nıkolchenko endi «Býrevestnıkti» jattyqtyrady. 

Sondaı-aq «Taraz» - «Pavlodar» matchynyń jeńimpazy jartylaı fınalǵa joldama alady. 
Shırek fınaldyq oıyndar 11 qazan kúni ótedi. Fınal 13 qazanǵa belgilengen.

Eske sala keteıik, budan buryn «Turannyń» tarıhynda tuńǵysh ret voleıboldan el chempıony atanǵanyn jazǵan bolatynbyz.