Aqtóbede vaktsına alýǵa tıis halyqtyń 44 paıyzy saldyrdy

AQTÓBE. QazAqparat - Aqtóbede bir táýlikte 4 myńnan astam adam vaktsına saldyrdy. Qazirgi kezde oblys turǵyndarynyń 78 myńǵa jýyǵy ekpeniń eki komponentin de qabyldaǵan, dep habarlaıdy QazAqparat tilshisi.

Aqtóbe oblysy boıynsha bir táýlikte 4129 adam vaktsına saldyrdy. Onyń 2474-i birinshi, al 1655-i eki komponentin de qabyldady.

Oblystyq densaýlyq saqtaý basqarmasy baspasóz qyzmetiniń habarlaýynsha, búginge deıin 204 744 adam birinshi komponentti aldy.

Bul - vaktsına qabyldaýy tıis óńir turǵyndarynyń 44,51 paıyzy.

Qazirgi kezde medıtsına qyzmetkerleriniń 91, al bilim salasy qyzmetkerleriniń 68 paıyzǵa jýyǵy ımmýndaý sharasyna qatysty.

Sonymen birge sozylmaly derti bar adamdar, stýdentter de ekpe qabyldap jatyr. Al polıtsııa qyzmetkerleri túgel vaktsına saldyrdy.

«Qazir óńirdiń 77 978 turǵyny, ıaǵnı, vaktsınatsııalaýǵa jatatyn adamdardyń 16,95 paıyzy ımmýndaldy. Adamdar arasynda vaktsınadan keıin keri áser alǵan eshkim bolmady»,- dedi oblystyq densaýlyq saqtaý basqarmasynyń baspasóz qyzmeti.