Aqtóbede úzdik aýdanǵa 10 mln teńge sertıfıkat berildi
Aqtóbeniń ár aýdany jaz boıy mádenı, sporttyq sharalar uıymdastyryp, qaıyrymdylyq aktsııasyn ótkizdi. Aqtóbe qalasynda kóshe kúnderi ótkizilip, Tuńǵysh Prezıdent atyndaǵy ortalyq saıabaqta mádenı sharalar uıymdastyryldy. Qala turǵyndary men qonaqtaryn án men bıge bólegen aýdan halqy kıiz úı tigip, tarıhı járigerler kórmesin jasady. Bir-birimen jarysqa túsken aýdandar búgin úzdikterin anyqtady.
«Bizdiń mindetimiz - ultymyzdyń ónerin, saltyn, ádebıetin, dástúrin kelesi urpaqqa jetkizý. Memleket basshysy Nursultan Nazarbaevtyń tapsyrmasyna sáıkes «Bolashaqqa baǵdar: rýhanı jańǵyrý» baǵdarlamalyq maqalasyndaǵy negizgi mindetterdiń biri óner, mádenıet, ádebıetimizge zaman talabany saı jańalyqty engizý qajet. «Týǵan jerim - nurly elim» aktsııasyn ótkizgende de osy maqsatty kózdedik. Aqtóbede turyp jatqan azamattarǵa, Aqtóbede týyp, basqa jerde ómir súrip jatqan jerlesterimizge týǵan eline, Qazaqstanǵa, Otanyna degen súıispenshiligin arttyrý maqsat boldy. Jaz boıy ár aýdan, Aqtóbe qalasy, aýyldyq okrýgter kúnderin ótkizdi. Aýdannyń múmkindikterin, jetistikterin kórsetýdi kózdep, kómekke muqtaj adamdarǵa kómektesý oıǵa alyndy. Áli de bolsa kemshilikter bar. Ár nárse basshyǵa baılanysty. Ákimi myqty bolsa, shara jaqsy ótedi. Talanttar bar, olardy izdep, tanytyp, qoldaý kerek. Olar Aqtóbede ǵana emes, Qazaqstanda, shetelde óz atyn tanytady»,- dedi Aqtóbe oblysynyń ákimi Berdibek Saparbaev. Óńir basshysy óz sózinde aǵaıyndy Jubanovtar otbasynyń óneri elge, álemge tanylǵanyn mysalǵa keltirdi.
Aıta keteıik, «Týǵan jerim - nurly elim» sharasy kezinde Hromtaý aýdanynyń «Zamandastar» halyqtyq ájeler hory «Maýsymjan», Baıǵanın aýdanynan kelgen «Aqnıet» otbasylyq ansambli «Gúlder-aıym» ánin oryndady. Qarǵaly aýdanynyń folklorlyq ansambli «Lojkarı» atty kompozıtsııasyn, Shalqar aýdany teatrlandyrylǵan ádebı-mýzykalyq qoıylymyn usyndy. Merekelik kesh sońynda jeńimpazdar marapattaldy. Alǵys hat jáne 1 mıllıon teńge syıaqy sporttyq sharalardy úzdik uıymdastyrǵan Shalqar aýdany, úzdik kórme usynǵan Baıǵanın aýdanyna berildi. Úzdik kóshe merekesin uıymdastyrǵany úshin «Tarıhı esim - urpaqqa ulaǵat» nomınatsııasy boıynsha Oıyl aýdanyna 1,5 mıllıon teńge tapsyryldy. Mártók aýdany da 1,5 mıllıon teńge aldy. Al aýyl sharýashylyǵy jármeńkesin úzdik uıymdastyrǵan Temir aýdany boldy. Bul aýdanǵa 2 mıllıon teńge buıyrdy. «Ónerimen óristi» nomınatsııasyn Muǵaljar aýdany ıelendi. Al bas júldeni Qobda aýdany aldy. Aýdanǵa 10 mıllıon teńgeniń sertıfıkaty berildi.