Aqtóbede uıymdasqan qylmystyq top azamattarǵa júrgizýshi kýáligin zańsyz berýmen aınalysqan
Top músheleri Mamandandyrylǵan Halyqqa qyzmet kórsetý ortalyqtarynyń (HQKO) qyzmetkerleri bolyp tabylady.
Júrgizilgen jedel-izdestirý is-sharalary barysynda emtıhan tapsyrýǵa arnalǵan synypqa kire beriste mindetti teorııalyq emtıhannan ótý kezinde HQO qyzmetkerleri ózderiniń qylmystyq róline sáıkes belgili bir kandıdattardy metall izdegishpen teksermeı, tizim boıynsha kedergisiz ótkizgeni anyqtaldy. Sonymen qatar aldyn ala aqsha bergen kandıdattardyń tizimin azamattyq tulǵalar, ıaǵnı top músheleriniń sybaılastary jasap otyrǵan.
Emtıhan tapsyrýshy qulapqaptarmen, mıkrofonmen jáne kameramen jabdyqtalyp, kompıýter synybyna ótip, monıtorda shyqqan suraqtardy qylmystyq toptyń múshesine kórsetip otyrǵan. Al ol óz kezeginde jaldamaly páterde otyryp, oǵan durys jaýaptardy nusqaǵan. Sondaı-aq toptyń taǵy bir múshesi emtıhan kezinde kórshi kabınette otyryp, olardy roýterdiń kómegimen ınternetpen qamtamasyz etken. Osylaısha azamattar testti zańsyz tapsyryp, júrgizýshi kýálikterine qol jetkizgen.
Jaldamaly páterdi tintý kezinde polıtsııa qyzmetkerleri 6 690 000 teńge, 1800 AQSh dollaryn tárkiledi. Sondaı-aq mını-qulaqqaptar, kishkentaı beınekameralar, kameralary bar emtıhan tapsyrýǵa arnalǵan jıletter, qýattaý qurylǵysy jáne taǵy da basqa zattar tárkilendi. Sonymen qatar jeke tekserý kezinde bir ekzamen tapsyrýshydan marıhýanaǵa uqsas ósimdik tektes zat tabyldy.
Arnaıy operatsııa barysynda Mamandandyrylǵan HQKO-nyń aýlasynda óz kezegin kútip turǵan, ózine qajetti tehnıkamen jabdyqtalǵan taǵy bir azamat ustaldy. Qazirgi ýaqytta qylmystyq shemaǵa tartylǵan adamdardyń áreketteri qujattaldy jáne tergeý amaldary júrgizilýde.