Aqtóbede úshem týdy

AQTÓBE. QazAqparat - Aqtóbe oblysynda úshem týdy, dep habarlaıdy QazAqparat oblystyq densaýlyq saqtaý basqarmasyna silteme jasap.

Vedomstvonyń málimetinshe, jýyrda oblystyq perınataldyq ortalyqta erekshe oqıǵa bolǵan. Perzenthanada bıylǵy ekinshi úshem dúnıege keldi.

Salmaǵy 2060, 1930 jáne 2260 gramm bolatyn náresteler júktiliktiń 32 aptasynda operatsııa arqyly merziminen buryn týǵan.

Erli-zaıyptylardyń budan bólek taǵy úsh balasy bar. Endi bul úıelmen kópbalaly otbasylar qataryna qosyldy.

Jas bosanǵan ana men jańa týǵan nárestelerdiń jaǵdaıy birqalypty.

«Jaqyn arada sábıler salmaq qosady, kópbalaly ana kúsh-qýatyn qalpyna keltiredi. Oblystyq perınataldy ortalyq anasy men qyzdaryna zor densaýlyq tileıdi» delingen mekemeniń habarlamasynda.

Eske salsaq, «Ańsaǵan sábı» baǵdarlamasy bala súıýdi armandap júrgen talaı otbasyna qýanysh syılady.

Buǵan deıin 13 jyl boıy taǵy da balaly bolýdy armandaǵan ana Qasym, Jomart, Kemel esimdi úshemdi ómirge ákelgen edi.

«Otbasynyń tuńǵyshy 13 jasta. Sodan beri balaly bola almaǵan soń kvotaǵa ótinish berdi. Úshemge júkti bolǵan kezde biz únemi baqylap, óz qadaǵalaýymyzǵa aldyq. Anasy balany aıy-kúni jetkende kesir tiligi arqyly ómirge ákeldi», - deıdi oblystyń shtattan tys bas reprodýktology Svetlana Esenamanova.

Eske sala keteıik, buǵan deıin Almatyda ekstrakorporaldy uryqtandyrý arqyly úshem dúnıege kelgenin jazǵan edik.

Ekstrakorporaldy uryqtandyrý 2020 jyldan beri mindetti áleýmettik medıtsınalyq saqtandyrý arqyly qarjylandyrylady.

Bıyl osyndaı 1304 jup EKO jasatqan. Oǵan saqtandyrý esebinen 1,3 mlrd teńge bólindi.