Aqtóbede úsh aı buryn lentasy qıylǵan sport kesheni áli qoldanysqa berilmedi

<p>Aqtóbe oblysy Shalqar aýdany Begimbet aýylynda osydan úsh aı buryn sport kesheniniń lentasy qıylǵanymen, nysan áli qoldanysqa berilmedi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Shalqar aýdanynyń Begimbet aýylyndaǵy dene shynyqtyrý-saýyqtyrý kesheni burynǵy ákim Eraly Toǵjanovtyń aýdanǵa sapary barysynda ashyldy. Sol kezde saltanatty túrde lentasy qıyldy. Aqtóbe oblysy ákimdiginiń áleýmettik jelidegi resmı paraqshasynda angar tıpti keshenniń qurylysy byltyr maýsym aıynda bastalǵany jazylǵan. 500-ge jýyq bala voleıbol, basketbol, kúres zaldarynda sportpen shuǵyldana alady.

Alaıda bıyl maýsym aıynyń sońynda aýyl halqy qýanǵanymen, keshen shyn máninde qoldanysqa berilmedi.

Aqtóbe oblystyq dene shynyqtyrý jáne sport basqarmasynyń basshysy Evgenıı Goncharovtyń aıtýynsha, nysandy Aqtóbe oblystyq qurylys, sáýlet jáne qala qurylysy basqarmasy sport basqarmasyna berýi tıis. Bul týraly Aqtóbe oblystyq qurylys, sáýlet jáne qala qurylysy basqarmasy basshysynyń mindetin atqarýshy Aslan Jarasbaevtan suraǵanymyzda, nysandy merdigerden qabyldap alǵanyn, sport basqarmasyna tapsyrý jumysy júrgizilip jatqanyn aıtty.

Aıshýaq aýyldyq okrýginiń ákimi Oralbek Ábshanovtyń aıtýynsha, sport kesheniniń kilti ózinde.

- Ázirge úıirmeler ashylmady. Mekteptiń dene shynyqtyrý páni muǵalimderi balalardy jarystarǵa aparar kezde jattyǵý ótkizedi. Meniń baqylaýymda. Kilti mende tur. Men ashyp-jabamyn. Balalar oınaǵysy kelgende alady,- dedi Oralbek Ábshanov.

Aqtóbe oblysy ákimi baspasóz qyzmetiniń habarlaýynsha, 10 kúnde qujattary rettelse, tolyqtaı iske qosylady.

- Balalar jaz boıy oınady, qazir de oınap jatyr. Aýdan ákimdigi bir aptada jylýyn qosamyz dep otyr,- dep habarlady Aqtóbe oblysy ákiminiń baspasóz hatshysy Gúlbaǵda Kóbeeva.