Aqtóbede úsh aýyldyń turǵyndary 10 kúnnen beri jaryqsyz otyr

AQTÓBE. QazAqparat – Aqtóbeniń Yrǵyz jáne Shalqar aýdandarynda úsh aýylda jaryq joq. Qazirgi kezde qulaǵan baǵanalardy qaıta ornatý jumysy aıaqtalyp qaldy, dep habarlaıdy QazAqparat tilshisi.

Yrǵyz aýdanynda Janys bı, Sheńbertal aýyldary jáne Shalqar aýdanynyń Tumalykól aýylynda jaryq joq.

Janys bı men Sheńbertal aýyldarynda 12 adam, 4 arnaıy tehnıka jumyldyryldy.

«Aýyldardy rezervtegi jelige qosamyz. Janys bı aýylyndaǵy ishki jelilerdi qaıta tekserip shyǵyp, keshke elektr togyn bermekpiz. Shalqardyń Tumalykól aýylynda 10 adam, 4 tehnıka jumyldyrylǵan. Onda 42 baǵana qulaǵan. Bári qaıta ornatyldy. Aýyldardaǵy áleýmettik nysandarǵa generator qosyldy. Al halyq jaryqsyz otyr. Jóndeý jumysyna aýa raıy keri áser etti. Jel kúsheıgen kezde kranmen jumys isteý qaýipti. Baǵanalar ornatylǵanymen, symyn tartý qıyndyq týǵyzdy», - dedi oblystyq energetıka jáne turǵyn úı-kommýnaldyq sharýashylyq basqarmasynyń bólim basshysy Nurbergen Bekeev.

Aıta keteıik, Janys bı jáne Sheńbertal aýyldarynda shamamen 1200, al Tumalykól aýylynda 200-ge jýyq adam bar.

Eske salsaq, sáýir aıynyń ortasynan Aqtóbedegi birneshe aýylda jaryq sónip qaldy.

Oblystyq energetıka jáne turǵyn úı-kommýnaldyq sharýashylyq basqarmasynyń bólim basshysy Nurbergen Bekeevtiń aıtýynsha, jalpy oblys boıynsha elektr jelisiniń 74 % tozǵan.