Aqtóbede un kombınaty táýligine 370 tonna ónim shyǵarady

AQTÓBE. QazAqparat - Aqtóbedegi «Jańa-Áljan» un-dıirmen kombınaty elimizdiń 10-nan astam óńirine un tasymaldaıdy, dep habarlaıdy QazAqparat tilshisi.

Aqtóbe qalasyndaǵy un kombınaty jergilikti suranysty ǵana emes, ózge óńirdegi tapsyrysty da jetkizedi. Kásiporyn jumys kestesin saqtap, halyqty turaqty tabyspen qamtyp otyr.

«Turǵyndardyń «un, makaron ónimderi jetpeıdi« dep alańdaýyna esh negiz joq. Kompanııa elimizdiń 10-nan astam oblysyna un jáne makaron ónimin jetkizip otyr. Sonyń ishinde Aqtóbe oblysy men qala turǵyndaryna jetedi. Shıkizat bar. Іshki naryqty qamtýdy jalǵastyrý úshin saqtyq sharasy qolǵa alynǵan. Qazir tórt surypty un shyǵarylyp jatyr», - dedi un-dıirmen kombınatynyń bas dırektory Beknur Beıis.

Munda táýligine 500 tonna bıdaı tartylyp, 370 tonna un shyǵarylady. Kombınatta 250 adam turaqty jumys isteıdi. Jumys orny qysqartylmaıdy. Tórt aýysymmen eńbek etip júrgen adamdardy qyzmettik kólik tasymaldaıdy.

«Saýda oryndaryna un men makaron ónimi der kezinde jetkiziledi. Áli de ónim kólemin arttyrýǵa múmkindik bar», - dedi dıirmen kombınatynyń basshysy Marat Jumajanov.