Aqtóbede ulttyq sport oıyndarynan jarys ótti

AQTÓBE. QazAqparat – Búgin oblys ortalyǵyndaǵy ıppodromda ulttyq sport oıyndarynan jarys ótti. Jarys Respýblıka kúnine arnalǵan is-sharalar jospary aıasynda uıymdastyryldy. Bul týraly QazAqparat oblys ákiminiń baspasóz qyzmetine silteme jasap habarlaıdy.

Sharaǵa Aqtóbe oblysynyń ákimi Eraly Toǵjanov, óńirdiń zııaly qaýym ókilderi, sportsúıer qaýym qatysty. Aımaq basshysy óz sózinde barsha Aqtóbe turǵyndary men qala qonaqtaryn Ulttyq mereke – Respýblıka kúnimen quttyqtap, oblystaǵy ulttyq sport oıyndarynyń damýy týraly sóz qozǵady.

«Oblysymyzda kókpar dese ishken asyn jerge qoıatyn azamattar az emes. Solardyń biri – alǵashqy kezeńderden oblysymyzdaǵy kókpar oıyndarynyń damýyna úles qosyp, qazir bapkerlik qyzmette júrgen taqymy tastaı kókparshy jigitterimiz Álıev Meırambek pen Dodaı Nurlandy biz árkez maqtanysh etemiz. Aýdaryspaqtan 2018 jyly Saǵymbaev Arman Azııa chempıony atansa, 2022 jyly Erjanov Shyńǵyshan álem chempıony boldy, Serǵazın Azamat qola júldege taban tiredi. Taıaýda ǵana Memleket basshysy Qasym-Jomart Toqaev ulttyń maqtanyshy ári qazynasy qazaqy tazy jáne tóbet ıt tuqymdaryn saqtaý jónindegi jumystardy úılestirýdi tapsyrdy. Qazirgi tańda aqtóbelik áýesqoı tazy begileriniń shoǵyry qalyptasyp otyr. Ári qaraı, Aqtóbe oblysynda tazy asyraý jáne ony baptaý jumystaryn júıelep, jolǵa qoıatyn bolamyz», - dedi oblys ákimi.

Sport sharasy barysynda Eraly Toǵjanov kókpar, aýdaryspaq, tazylar jarysynda júldeli oryndarǵa ıe bolǵan sportshylardy marapattady. Alǵys hattar men aqshalaı syılyqtar tabystady.

«Qumaı tazylar» jarysy men «Aýdaryspaq» sporttyq saıysynyń jeńimpazdaryna berilgen júlde qory birdeı, árqaısysy – 500 myń teńge. Al, «Kókpar» oıynynda júlde qory – 3 mln teńge. Bul jarysta bas báıge men birinshi oryndy aqtóbelik komandalar ózara bólisse, úshinshi oryn Baıǵanın aýdanynyń shabandozdaryna buıyrdy.

Sondaı-aq, oblys ákimi Qazaqstanda alǵash ret uıymdastyrylǵan respýblıkalyq «Uly Dala joryǵy» at sporty marafonyna qatysqan Aqtóbe oblysynyń sportshylaryn quttyqtap, marapattady. Aıta ketý kerek, bul jobada sportshylar marafonǵa qatysyp, uly dala rýhyn sezinýge jáne túrkilerdiń kıeli jerleri – Joshy han, Alasha han keseneleri sııaqty kóne mádenıetterdiń tarıhı oryndaryna barýǵa múmkindik aldy.

Sonymen qatar, Eraly Toǵjanov ıppodrom kireberisinde uıymdastyrylǵan jergilikti taýar óndirýshilerdiń jármeńkesin, qolónershiler kórmesin aralady.