Aqtóbede ÚEU jetekshisi alaıaqtyǵy úshin sottaldy
№2 Aqtóbe qalalyq sotynda «Aqtóbe oblysy jastar jáne balalar uıymdarynyń qaýymdastyǵy» zańdy tulǵalar birlestiginiń jetekshisi Jandos Tabylǵanovtyń isi qaraldy. Oǵan Qylmystyq kodekstiń «Alaıaqtyq» baby boıynsha aıyp taǵyldy.
Sot kabınetindegi aqparatqa súıensek, Jandos Tabylǵanov byltyr qyrkúıek aıynda saýda úıinde qala turǵynymen áńgimelesip, sheberhanaǵa gaz qubyryn tartý máselesin sheship berýge ýáde etedi. Ol óz qyzmeti úshin 1,3 mln teńge surady.
Qala turǵyny 300 myń teńgeni qolma-qol berip, keıin qolyndaǵy 300 myń teńge turatyn altyn bilezigin usynǵan.
2023 jyly 20 qyrkúıekte taǵy da kezdesip, kásipkerlerge arnalǵan «Garant» jobasy arqyly qaıtarymsyz 8 mln teńge aqsha alyp bere alatynyn aıtqan. Ol úshin 2 mln teńge suraǵan.
Jábirlenýshi aqshany bólip-bólip aýdaryp, keıde qolma-qol berip otyrǵan.
Taǵy bir kezdesýde jábirlenýshi eki qabatty úıin zańdastyrmaq nıetin bildiredi. Sol kezde J.Tabylǵanov bul qyzmeti úshin 300 000 teńge aqsha suraǵan.
Bir aıdan soń sottalýshy men jábirlenýshi qaıta kezdesip, jábirlenýshi túrmede otyrǵan kúıeýin bostandyqqa shyǵaryp alǵysy keletinin aıtady. Jandos Tabylǵanov paıda tabý maqsatynda 12 mln teńge aqsha suraǵan jáne sotta onyń aqshany qolma-qol alǵany týraly aıtylǵan. Sóıtip jábirlenýshige 14,9 mln teńge shyǵyn keltirdi.
Sottalýshy J.Tabylǵanov sot otyrysynda taǵylǵan aıypty moıyndamady.
- Jandos Tabylǵanov Qylmystyq Kodekstiń 190-babynyń 4-bóliginiń 2-tarmaǵymen kózdelgen qylmysty jasaǵany úshin kináli dep tanylsyn. Oǵan 5 jyl merzimge bas bostandyǵynan aıyrý jazasy taǵaıyndalsyn. J.Tabylǵanovqa jazany óteý orny qylmystyq-atqarý júıesiniń ortasha qaýipsiz mekemesi taǵaıyndalsyn. Jábirlenýshiniń talap aryzy ishinara qanaǵattandyrylsyn.
Sottalǵan Jandos Tabylǵanovtan jábirlenýshiniń paıdasyna 14 900 000 teńge materıaldyq shyǵyn, ókildiń kómegi úshin tólengen 600 000 teńge óndirilsin,- dedi sýdıa I.Ismaılov.
Sot úkimi zańdy kúshine engen joq.